: साउदी सरकारले एक साताको अवधिमा बिभिन्न क्षेत्र गरी १४ हजार २४२ गैरकानूनी आप्रवासी पक्राउ गरेको छ । साउदी गृह मन्त्रालयका अनुसार मार्च २६ देखि अप्रिल १ सम्म सञ्चालन गरिएको संयुक्त सुरक्षा निरीक्षण अभियानका क्रममा देशभरबाट उनीहरूलाई नियन्त्रणमा लिइएको हो ।
पक्राउ परेकामध्ये ७,८८४ जनाले रेसिडेन्सी (बसोबास) कानून उल्लंघन गरेका छन् भने ३,९४८ जनाले सीमा सुरक्षा कानून र २,४१० जनाले श्रम कानून उल्लंघन गरेका छन् । साथै अधिकारीहरूले अवैध रूपमा बसोबास गर्नेहरूमाथि कारबाही तीव्र बनाएको जनाउँदै २३ हजार ८१५ जनालाई यात्रा कागजात तयारीका लागि सम्बन्धित दूतावासमा पठाइएको जानकारी समेत दिएका छन् ।
जसमा ६,८०८ जनाको यात्रा प्रक्रिया पूरा गरिएको छ भने ६,२८५ जनालाई देश निकाला गरिसकिएको छ । यसैबीच अवैध रूपमा देश प्रवेश गर्ने प्रयास समेत रोकिएको छ । सुरक्षा बलहरूले १,४४९ जनालाई सीमा पार गर्ने क्रममा पक्राउ गरेका छन् । जसमध्ये २७ प्रतिशत यमन र ७१ प्रतिशत इथियोपियाका नागरिक रहेका छन् ।
बाँकी २ प्रतिशत अन्य मुलुकका नागरिक रहेका छन् । अवैध बसोबास गर्नेहरूलाई सहयोग गरेको आरोपमा २५ जनालाई पक्राउ गरिएको छ । उनीहरूले यातायात, आश्रय तथा रोजगारी उपलब्ध गराएको जनाइएको छ । हाल ३६ हजार ३६५ आप्रवासीहरू कानुनी प्रक्रियामा रहेका छन्, जसमा ३२ हजार ३०९ पुरुष र ४,०५६ महिला छन् ।
गृह मन्त्रालयले अवैध बासिन्दालाई सहयोग गर्ने जोकोहीलाई कडा सजाय हुने चेतावनी समेत दिएको छ । यस्तो कार्यमा संलग्नलाई १५ वर्षसम्म कैद, १० लाख साउदी रियालसम्म जरिवाना तथा प्रयोग गरिएका सवारी साधन वा सम्पत्ति सबै जफत गरिने जनाएको छ ।
