: अमेरिकाले दिवंगत इरानी जनरल कासिम सुलेमानीका आफन्तहरुलाई पक्राउ गरिएको दावी गरेको छ । अमेरिकी विदेश मन्त्रालयले इरानको इस्लामिक रिभोलुसनरी गार्ड कोप्र्सका पूर्व कमाण्डर जनरल कासिम सुलेमानीकी भान्जी हमीदेह सुलेमानी अफशार र उनकी छोरीको वैध स्थायी बसोबास (ग्रीन कार्ड) विदेशमन्त्री मार्को रुबियोले खारेज गरेका छन् ।
तर, सुलेमानीकी छोरीले अमेरिकी दाबीलाई असत्य भन्दै पक्राउ परेका व्यक्तिहरूको आफ्नो बाबुसँग ‘कुनै पनि सम्बन्ध नभएको’ बताएकी छन् । सुलेमानी इरानका सबैभन्दा शक्तिशाली सैन्य कमाण्डरमध्ये एक थिए । उनी सन् २०२० मा इराकमा अमेरिकी हवाई आक्रमणमा मारिएका थिए । उक्त आक्रमण तत्कालीन अमेरिकी राष्ट्रपति डोनाल्ड ट्रम्पको आदेशमा गरिएको थियो ।
सामाजिक सञ्जालमा लेख्दै रुबियोले ती दुई महिला अमेरिकी आप्रवासन तथा भन्सार कार्यान्वयन (आइसीई) को हिरासतमा रहेको र उनीहरूलाई देशबाट निकाल्ने प्रक्रिया चलिरहेको बताएका छन् । अमेरिकी होमल्याण्ड सेक्युरिटी विभाग (डीएचएस) का अनुसार, सुलेमानी अफशार सन् २०१५ मा पर्यटक भिसामा अमेरिका प्रवेश गरेकी थिइन् ।
२०१९ मा शरण पाएकी थिइन् र २०२१ मा ग्रीन कार्ड प्राप्त गरेकी थिइन् । सन् २०२५ मा नागरिकता आवेदन दिँदा उनले ग्रीन कार्ड पाएपछि चार पटक इरान गएको खुलासा गरेकी थिइन् । डीएचएसका अनुसार, उनकी छोरी सरिनासादत होसेइनी पनि २०१५ मा विद्यार्थी भिसामा अमेरिका आएकी थिइन् । २०१९ मा शरण पाएकी थिइन् र २०२३ मा ग्रीन कार्ड पाएकी थिइन् ।
