: झापाको भद्रपुरमा ठूलो परिमाणमा लागूऔषध ब्राउन सुगरसहित दुईजना पक्राउ परेका छन्। पक्राउ पर्नेहरूमा भद्रपुर नगरपालिका–४ का ३० वर्षीय बब्लु मर्डी र बिर्तामोड नगरपालिका–१ का २७ वर्षीय अनमोल गजमेर रहेका छन्।
भद्रपुर नगरपालिका–४ डाँगीबारीस्थित लुखिराम मर्डीको घरमा लागुऔषध ओसारपसार तथा बिक्री–वितरण भइरहेको भन्ने गोप्य सूचनाका आधारमा वडा प्रहरी कार्यालय भद्रपुरका प्रहरी निरीक्षक मोतीलाल योन्जन तामाङको कमान्डमा खटिएको टोलीले आज दिउँसो साढे १ बजे छापा मारेर उनीहरूलाई पक्राउ गरेको जिल्ला प्रहरी कार्यालय झापाले जनाएको हो।
प्रहरीले लुखिरामको घर बाहिर कम्पाउन्डमा टिनको डिब्बाभित्र लुकाइछिपाइ राखिएको अवस्थामा प्लास्टिक बाहेक २१८ ग्राम ५०० मिलिग्राम ब्राउन सुगर, नगद ३ लाख २५० तथा विदेशी मुद्रा अमेरिकी डलर ७५, पाकिस्तानी रुपैयाँ ५०, अस्ट्रेलियन डलर ५ र भारतीय रुपैयाँ ५३० बरामद गरेको छ।
प्रहरीका अनुसार पक्राउ परेका बब्लु लामो समयदेखि बाउन सुगरको कारोबारी गर्दै आइरहेका थिए। बब्लुसँग ब्राउन सुगर खरिद गर्न अनमोल त्यहाँ पुगेका थिए। बिर्तामोड स्थायी ठेगाना भएका अनमोल काठमाडौँ बस्दै आएका छन्। उनी आज बिहान प्लेन चढेर भद्रपुर आएको र ब्राउन सुगर खरिद गरी काठमाडौं फर्किने योजनामा थिए।
अनमोलकै साथबाट नगद र विदेशी मुद्रा फेला परेको हो। बब्लु भने सीमा पारीको भारतीय बजार गलगलिया क्षेत्रबाट ब्राउन सुगर ल्याएर नेपालमा बिक्री वितरण गर्दै आइरहेका थिए। यता पक्राउ परेकाहरूलाई थप अनुसन्धानका लागि जिल्ला प्रहरी कार्यालय झापा पठाइएको छ।
