: नवनियु्क्त महान्यायाधिवक्ता डा. नारायणदत्त कँडेलले आफ्नो कुनै देशको पीआर नभएको दाबी गरेका छन्। उनले आफूसँग संवैधानिक नियुक्तिका लागि अयोग्य हुने कुनै भिसासमेत नभएको अन्नपूर्णसँग बताएका हुन्।
गैरआवासीय नेपाली संघ बेलायतका पूर्वउपाध्यक्ष बनिसकेका कँडेललाई सरकारको मुख्य कानुनी सल्लाहकारको रुपमा रहने महान्यायाधिवक्ता पदमा नियुक्ति दिएपछि पीआरसमेत रहेको भन्दै चर्चामा आएपछि उनले प्रतिक्रिया दिएका हुन्।
उनले आफू बेलायतका अध्ययनका लागि गएको जानकारी दिए। ‘म बेलायतमा अध्ययनका लागि गएको सत्य हो। तर, मेरो बेलायतको पीआर छ भन्ने दाबी गलत हो। यस्तो दाबी गर्नेहरुले वस्तुनिष्ठ तरिकाले उनीहरुले छ भनेको पीआरको रिफरेन्समा कुरा गर्नु भएको भए हुने थियो।’ नवनियु्क्त महान्यायाधिवक्ता डा. कँडेलले अन्नपूर्णसँग भने,‘मसँग अहिले कुनै देशको त्यस्तो भिसासम्म छैन जसका कारणले मैले नेपालको संविधान अनुसार संवैधानिक नियुक्ति लिन अयोग्य होस्। अतः आधार बिना अनुमानका भरमा लेखिएको कुरालाई केही भनिरहनु परेन।’
आइतबार सरकारको सिफारिसमा राष्ट्रपति रामचन्द्र पौडेलले उनलाई महान्यायाधिवक्ता नियुक्त गरेका थिए। कँडेलले कायममुकायम प्रधानन्यायाधीश सपना प्रधान मल्लसँग पद तथा गोपनीयताको शपथ लिएपछि उनले पदभार ग्रहण गरेका हुन्।
