: इजरायलले इरानको प्रमुख पेट्रोकेमिकल केन्द्रमा आक्रमण गरेपछि इरानले प्रस्तावित अस्थायी युद्धविराम अस्वीकार गरेको छ।
पश्चिम एसियामा जारी युद्धबीच इजरायलले इरानको दक्षिण पार्स क्षेत्रस्थित महत्वपूर्ण पेट्रोकेमिकल तथा ऊर्जा संरचनामा हवाई आक्रमण गरेको हो। यो आक्रमण इरानको अर्थतन्त्रका लागि अत्यन्तै महत्वपूर्ण मानिने संरचनामा केन्द्रित रहेको अन्तर्राष्ट्रिय सञ्चारमाध्यमहरूले जनाएका छन्।
युद्ध चर्किँदै जाँदा अमेरिका, इजरायल र क्षेत्रीय मध्यस्थकर्ताहरूले अस्थायी युद्धविरामका लागि प्रस्ताव अघि सारेका थिए। तर इरानले उक्त प्रस्ताव अस्वीकार गर्दै केवल स्थायी रूपमा युद्ध अन्त्य हुने सुनिश्चितता भएमा मात्र सहमति जनाउने अडान लिएको छ।
इरानले स्पष्ट रूपमा अस्थायी युद्धविरामलाई अस्वीकार गर्दै दीर्घकालीन समाधान र आफ्नो सुरक्षा सुनिश्चित हुने ग्यारेन्टी माग गरेको बताइएको छ।
यसबीच इजरायलले इरानका ऊर्जा तथा औद्योगिक संरचनामाथि लगातार आक्रमण तीव्र बनाएको छ भने इरानले पनि मिसाइल आक्रमणमार्फत जवाफी कारबाही जारी राखेको छ।
इजरायलका रक्षा मन्त्री इजरायल काट्जले विज्ञप्ति जारी गरेर पेट्रोकेमिकल संरचनामाथि आक्रमण भएको बताएका छन्। उनका अनुसार आइडीएफले अहिले इरानको सबैभन्दा ठूलो पेट्रोकेमिकल सुविधा, असालुयेहस्थित केन्द्रमा शक्तिशाली आक्रमण गरेको छ। उक्त केन्द्रबाट देशको करिब आधा पेट्रोकेमिकल उत्पादन हुने गरेको थियो।
काट्जले यसलाई इरानका लागि अर्बौं डलर बराबरको ठूलो आर्थिक झट्का भएको बताएका छन्। उनका अनुसार पेट्रोकेमिकल उद्योगले रिभोल्युसनरी गार्ड्सका गतिविधि सञ्चालन तथा इरानको सैन्य शक्ति विस्तारमा महत्वपूर्ण भूमिका खेल्ने गर्दछ। इरानको अर्धसरकारी समाचार एजेन्सी तस्नीमले पनि देशका दुई पेट्रोकेमिकल कम्पनीमाथि आक्रमण भएको पुष्टि गरेको छ। इरानको साउथ पार्स ग्यास क्षेत्र विश्वकै सबैभन्दा ठूलो प्राकृतिक ग्यास क्षेत्रमध्ये एक मानिन्छ।
फार्स समाचार एजेन्सीका अनुसार आक्रमणका कारण आगलागी भएको थियो, जसलाई प्रारम्भिक केही मिनेटमै नियन्त्रणमा लिइएको थियो।
