: अमेरिकाका राष्ट्रपति डोनाल्ड ट्रम्पले इरानसँग पाकिस्तानमा वार्ताको तयारी चलिरहेका बेला हर्मुज जलडमरूमध्य चाँडै नै पुनः खुल्ने बताएका छन् । तेहरानद्वारा गरिएको नाकाबन्दीका कारण विश्व ऊर्जा आपूर्तिमा ठूलो असर परेको छ । पाकिस्तानमा अमेरिकी र इरानी अधिकारीबीच हुने शान्ति वार्ताको पूर्व सन्ध्यामा टम्पले अमेरिकाले ‘खाडी क्षेत्र खोल्ने’ र अन्य देशहरू पनि सहयोग गर्ने बताएका छन् । यो सजिलो नभएको बताउँदै ट्रम्पले भने, ‘म भन्छु, हामी यो चाँडै खोल्नेछौं ।’
ट्रम्पले यो महत्वपूर्ण समुद्री मार्ग खोल्नेबारे विस्तृत रूपमा नबताउँदै इरानले उक्त जलमार्गमा ‘टोल बूथ’ जस्तो प्रणाली लगाउने कुरा आफूले स्वीकार नगर्ने पनि बताए । इरानले युद्ध अन्त्य गर्ने सम्झौता भए पनि जहाजहरूबाट सुरक्षित आवतजावतका लागि शुल्क लिन चाहेको संकेत गरेको छ ।
‘यदि उनीहरूले यस्तो गर्छन् भने हामी त्यसलाई हुन दिने छैनौं’, ट्रम्पले भनेका छन् । ट्रम्पले कुनै पनि शान्ति सम्झौतामा इरानले आणविक हतियार नपाउनु नै मुख्य प्राथमिकता हुने बताए । त्यसपछि जलमार्ग स्वतः खुल्ने उनले दाबी गरे ।
‘आणविक हतियार नहुनु नै ९९ प्रतिशत कुरा हो’, ट्रम्पले भने । मंगलबार अमेरिका र इरानबीच दुई हप्ते युद्धविराम घोषणा भएता पनि, हर्मुज जलडमरूमध्यबाट हुने ढुवानी अझै पनि लगभग ठप्प छ, जसले विश्वको करिब एक–पाँचौँ तेल र प्राकृतिक ग्यास आपूर्तिमा अवरोध पुर्याएको छ । सिफारिस गरिएको तथ्याङ्क अनुसार शुक्रबार केवल दुईवटा जहाज मात्र उक्त जलमार्ग पार गरे, जबकि अघिल्लो दिन पाँच वटा थिए ।
युद्ध सुरु भएदेखि युद्धविराम घोषणा भएको समयसम्म, केवल २२ वटा जहाज मात्र आफ्नो स्वचालित पहिचान प्रणाली अन गरेर जलमार्ग पार गरेर बाहिर निस्किएका छन्, जबकि सामान्य अवस्थामा दैनिक करिब १३५ वटा जहाज आवतजावत गर्ने गर्थे ।
