: दक्षिणी लेबनानको नबातियेह सहरमा भएको इजरायली आक्रमणमा १३ जना सरकारी सुरक्षाकर्मीको मृत्यु भएको लेबनानी राष्ट्रपति कार्यालयले जनाएको छ।
सामाजिक सञ्जाल 'एक्स' मार्फत एक विज्ञप्ति जारी गर्दै लेबनानी राष्ट्रपति जोसेफ आउनले उक्त आक्रमणको कडा शब्दमा निन्दा गरेका छन् ।
राष्ट्रपति कार्यालयका अनुसार इजरायली सैन्य कारबाहीमा सुरक्षा निकायका सदस्यहरूले ज्यान गुमाएका हुन्। यद्यपि, यस घटनाबारे इजरायली सेनाले हालसम्म आधिकारिक रूपमा कुनै टिप्पणी गरेको छैन।
अर्कोतर्फ, इजरायली सेनाले पनि 'एक्स' मै एक बयान जारी गर्दै दक्षिणी लेबनानमा एउटा विस्फोटक ड्रोन खस्दा आफ्ना एक सैनिक गम्भीर घाइते भएको दाबी गरेको छ। उक्त घटनामा अर्का एक सैनिक सामान्य घाइते भएका छन्।
इजरायली सेनाका अनुसार घाइते दुवै सैनिकलाई उपचारका लागि अस्पताल लगिएको छ र उनीहरूका परिवारलाई यसबारे जानकारी गराइसकिएको छ। पछिल्लो समय लेबनान र इजरायल सीमा क्षेत्रमा तनाव र सैन्य मुठभेडका घटनाहरू तीव्र रूपमा बढिरहेका छन्।
