: नेपाली राष्ट्रिय टिम तथा नेपाल पुलिस क्लबका अनुभवी बलिङ अलराउन्डर करण केसीले प्रधानमन्त्री कपको एक खेल खेल्न नपाउने भएका छन् । जारी प्रधानमन्त्री कप राष्ट्रिय एक दिवसीय प्रतियोगिता २०८२ अन्तर्गत शुक्रबार मधेश र बागमतीको खेलमा बागमती प्रदेशका कप्तान सन्दीप लामीछाने र अम्पायरबीच भएको वादविवादका विषयमा एक टिप्पणीका कारण विवादमा तानिएका हुन् ।
उनले सन्दीप र अम्पायरको भिडियोमा एक कमेन्ट गर्दै ‘यदि खेलाडीले कुनै अम्पायरलाई गल्तीले पिट्यो भने अर्थात गल्ती गरेर पिट्यो भने कति खेल निलम्बन हुन्छ ?’ भन्ने खालको अभिव्यक्ति लेख्दा उनी चर्चामा आएका हुन् ।
यसै विषयमा अम्पायर तथा स्कोर संघले यस विषयमा गम्भिर आपति र विज्ञप्ती जारी गर्दै करणको उक्त कार्यको भत्सर्ना गरेको थियो । यसै विषयलाई आधार मान्दै नेपाल क्रिकेट संघ (क्यान) ले करणलाई एक खेलमा प्रतिबन्ध र एक खेलको शतप्रतिशत म्याच शुल्य जरिवाना गर्ने निर्णय गरेको हो । करणको अभिव्यक्ति खेल भावना अनुरुप नभएको भन्दै क्यानले करणलाई कारबाही गरेको हो ।
यद्यपी करण केसीले आइतबार बिहानै आफ्नो त्यो अभिव्यक्ति मजाकस्वरुप रहेको भन्दै एक स्टाटस मार्फत माफि समेत मागी सकेका छन् । ‘यदि खेलाडी र अम्पायरबीच हातपात हुँदा के हुन्छ होला ? भनेर मजाकका रूपमा लिएको एउटा जिज्ञासा व्यक्त गरेको थिएँ । क्रिकेटमा अम्पायर, कोच र खेलाडी सबै एउटै परिवार जस्तो हुने भएकोले उक्त मजाक गरेर लेखिएको अभिव्यक्तिले कसैलाई ठेस पुगेको भए क्षमायाचना गर्दछु ।’
