: लागुऔषध खैरो हेरोइन (ब्राउन सुगर)सहित विराटनगरबाट एक जना पक्राउ परेका छन् । भारतको जोगवनीबाट खैरो हेरोइन खरिद गरेर आउँदै गर्दा धनकुटाको धनुकटा नगरपालिका–६ का २६ वर्षीय झुमबहादुर भुजेल पक्राउ परेका हुन् ।
मोरङ प्रहरीका सूचना अधिकारी डीएसपी लीलाराज लामिछानेले विराटनगर महानगरपालिका–१५ स्थित १ नम्बर ढाटबाट भुजेललाई शनिबार दिउँसो २ बजेतिर पक्राउ गरिएको जानकारी दिए । जोगवनीबाट नेपालतर्फ पैदल नै आउँदै गरेको अवस्थामा शंका लागेपछि प्रहरीले भुजेललाई नियन्त्रणमा लिएको थियो ।
नियन्त्रणमा लिएर शरीर खानतलासी गर्दा साथबाट लागुऔषध (खैरो हेरोइन) १८ ग्राम २३० मिलिग्राम बरामद भएको डीएसपी लामिछानेले बताए । इलाका प्रहरी कार्यालय रानीको हिरासतमा राखिएका भुजेलविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ । इलाका प्रहरी कार्यालय रानीका इन्स्पेक्टर कविन राई नेतृत्वको टोलीले उनीमाथि थप अनुसन्धान गरिरहेको छ ।
