: इरानी उच्चस्तरीय प्रतिनिधिमण्डल अमेरिकासँगको सम्झौतामा सहमति नजुटेपछि स्वदेश फर्किएको छ। इरानी संसदका सभामुख मोहम्मद बगेर गालिबाफको नेतृत्वमा आएको उक्त टोली स्थानीय समयअनुसार आज बिहान करिब ८ बजेपछि इस्लामाबादबाट उडेको हो।
यसअघि, अमेरिकी प्रतिनिधिमण्डल पनि शान्ति वार्तामा कुनै ठोस सम्झौता हुन नसकेपछि पाकिस्तानबाट फर्किसकेको छ। अमेरिकी टोलीको नेतृत्व उपराष्ट्रपति जेडी भेन्सले गरेका थिए।
गत मंगलबार राति २ साताका लागि युद्धविराम गरेपछि स्थायी समाधानका लागि भन्दै अमेरिका र इरान पाकिस्तानको मध्यस्थतामा वार्ताको टेबुलमा बसेका थिए। तर युद्धविराम सम्झौतापछि पनि इजरायलले लेबननमा हमला जारी राखेपछि इरान रिसाएको थियो। यस विषयमा वार्तामा बस्नुअघि नै अमेरिका र इरानबिच मतभेद भइरहेको थियो।
गत फेब्रुअरी २८ मा इजरायल र अमेरिकाले इरानमा संयुक्त हवाई हमला गरी सर्वोच्च नेतालगायत शीर्ष नेता तथा अधिकारी मारेपछि मध्यपूर्वभरि द्वन्द्व फैलिएको छ।
दुई कट्टर प्रतिद्वन्द्वी राष्ट्रका उच्च नेताहरूलाई एउटै सहरमा उतारेर वार्ता गराउने पाकिस्तानको प्रयास 'साहसी' मानिए पनि परिणाम शून्य देखिएको छ। अमेरिकी र इरानी टोलीको यो फिर्तीले मध्यपूर्वको द्वन्द्व तत्काल साम्य हुने संकेत देखाउँदैन। बरु, इजरायल र इरानबीचको तनावले यस क्षेत्रलाई अझै अस्थिर बनाउने जोखिम बढेको छ।
इरान र अमेरिका दुवैका अधिकारीहरू एकपछि अर्को गर्दै बाहिरिएपछि अब पाकिस्तानको 'मध्यस्थकर्ता' को भूमिका र दक्षिण एसियाली कुटनीति कुन दिशामा जान्छ भन्ने विषयमा नयाँ बहस सुरु भएको छ।
