: अमेरिका र इरानबीचको पाकिस्तानमा भएको वार्ता असफल भएको छ । अमेरिकी उपराष्ट्रपति जेडी भान्सले अमेरिका र इरानबीच कुनै सहमति हुन नसकेको जानकारी दिएका छन् । उनले भने, ‘हामी यहाँबाट एउटा धेरै सरल प्रस्ताव दिएर जाँदैछौं, यही हाम्रो अन्तिम र सबैभन्दा राम्रो प्रस्ताव हो । अब हेर्नेछौं, इरानले यसलाई स्वीकार गर्छ कि गर्दैन ।’
इस्लामाबादमा आयोजित एक प्रेस सम्मेलनमा उनले भने, ‘पाकिस्तानले वार्तालाई व्यवस्थित ढंगले सञ्चालन गर्न राम्रो काम ग¥यो, ताकि कुनै सहमति हुन सकोस् ।’ उनले भने, ‘हामी २१ घण्टादेखि यस विषयमा लागिरहेका छौँ, तर खराब खबर यो हो कि हामी कुनै निष्कर्षमा पुग्न सकेनौं ।’ उनले थपे, ‘हामीले आफ्नो सीमा स्पष्ट गरेका छौं । उनीहरूले हाम्रो शर्तहरू स्वीकार गर्न अस्वीकार गरे । वार्तामा भएका कमजोरीहरू पाकिस्तानका कारण थिएनन्, उनीहरूले उत्कृष्ट काम गरे ।’
उनले पाकिस्तानका प्रधानमन्त्री शहबाज शरीफ र फिल्ड मार्शल आसिम मुनीरको प्रशंसा पनि गरे । उनले अमेरिकी प्रतिनिधिमण्डल अब पाकिस्तान छोड्दै गरेको पनि बताए । बीबीसी उर्दूका अनुसार हाल उपराष्ट्रपति अमेरिका फर्किसकेका छन् । बीबीसीका सुरक्षा स्रोतहरूले प्राप्त गरेको एक भिडियोमा अमेरिकी उपराष्ट्रपतिलाई पाकिस्तानी सेना प्रमुख फिल्ड मार्शल आसिम मुनीर, विदेश मन्त्री इसहाक डार र गृहमन्त्री मोहसिन नकवीले विदाइ गरिरहेको देखिन्छ ।
यसअघि, इरान र अमेरिकी प्रतिनिधिमण्डलबीच शनिबार सुरु भएको इस्लामाबाद वार्ता राति अबेरसम्म चलेको थियो । पाकिस्तानले दुवै देशबीच मध्यस्थको भूमिका निभाइरहेको छ । बीबीसी संवाददाता क्रिस्टल हेजका अनुसार, इस्लामाबाद समयअनुसार बिहान ४ः५० बजेसम्म वार्ता जारी रहेको थियो ।
पाकिस्तानको राजधानी इस्लामाबादस्थित सेरेना होटलमा यो वार्ता भएको थियो । इरानी विदेश मन्त्रालयका प्रवक्ताले बताएअनुसार, वार्तामा होर्मुज स्ट्रेट, परमाणु मुद्दा, युद्धमा भएको क्षतिको क्षतिपूर्ति, प्रतिबन्ध हटाउने र क्षेत्रीय युद्धको पूर्ण अन्त्यबारे छलफल भएको थियो । वार्ता समाप्त हुनुअघि नै अमेरिकी राष्ट्रपति डोनाल्ड ट्रम्पले पत्रकारहरूसँग भनेका थिए ‘इरानसँग सहमति हुन्छ वा हुँदैन, त्यसले मलार्य कुनै फरक पार्दैन ।’
