: बुधबारदेखि खत्याड गाउँपालिकामा इलाका प्रशासन कार्यालय, मालपोत कार्यालय र नापी कार्यालय स्थापना भई औपचारिक रूपमा सेवा प्रवाह सुरु भएको छ। गाउँपालिकाभित्रै रहेको भवनबाट सुरु गरिएका यी कार्यालयहरूले अब जिल्लास्तरबाट प्रदान हुने अधिकांश सेवाहरू स्थानीय तहबाटै उपलब्ध गराउनेछन्।
यसअघि खत्याडका सर्वसाधारण नागरिकता, राष्ट्रिय परिचयपत्र, जग्गा दर्ता, नापजाँच लगायतका कामका लागि दुई दिनसम्म पैदल यात्रा वा सडक यातायात प्रयोग गरी जुम्ला, बाजुरा वा हुम्ला हुँदै सदरमुकाम गमगढी पुग्न बाध्य थिए। सामान्य प्रशासनिक कामकै लागि ५ हजारदेखि १० हजार रुपैयाँसम्म खर्च गर्नुपर्ने अवस्था थियो, जसले आर्थिक मात्र नभई शारीरिक रूपमा पनि ठूलो कष्ट निम्त्याएको स्थानीयहरूले बताएका छन्।
खत्याड गाउँपालिका–३ का स्थानीय गगन बुढा भन्छन्, ‘सडक सञ्जाल नहुँदा नागरिकता बनाउन वा अन्य कामका लागि सदरमुकाम पुग्न निकै दुःख थियो। विशेषगरी वृद्धवृद्धा र अपाङ्गता भएका व्यक्तिहरूलाई झन् समस्या हुन्थ्यो। अब गाउँमै सेवा पाइने भएपछि हामीलाई ठूलो राहत मिलेको छ।’
सोही गाउँपालिका–७ की दुवु डागर भन्छिन्, ‘नागरिकता वा अन्य सरकारी कामकै लागि सदरमुकाम पुग्न १ दिनदेखि २ दिन पैदल हिँड्नु पर्ने बाध्यता थियो। वडाबाट लिएको सिफारिस मिलेन भने फेरि गाउँमै फर्केर अर्को दिन सदरमुकाम पुगेका स्थानीयहरूको धेरै घटना छन्। अब गाउँपालिकामै सबै सेवा पाउने भएपछि स्थानीयहरूले त्यस्ता दुःख कष्ट कमै पाउनेछन्।’
बुधबारदेखि सञ्चालनमा आएका यी तीनवटै कार्यालयले नागरिकता वितरण, राष्ट्रिय परिचयपत्र दर्ता, जग्गा प्रशासन तथा नापजाँच सम्बन्धी सम्पूर्ण कार्यहरू स्थानीय स्तरमै उपलब्ध गराउनेछन्। यससँगै खत्याडका बासिन्दाले अब सामान्य प्रशासनिक कामका लागि सदरमुकाम धाउनुपर्ने बाध्यता अन्त्य भएको प्रमुख जिल्ला अधिकारी खडानन्द खत्रीले बताए।
