: इरानले आफ्ना विभिन्न छिमेकी देशहरुसँग युद्धमा भएको क्षतिको क्षतिपूर्ति मागेको छ । इरानले आफ्ना छिमेकी देशहरू–साउदी अरब, यूएई, कतार, बहराइन र कुवैतसँग युद्धमा भएको क्षतिको क्षतिपूर्ति मागेको हो ।
संयुक्त राष्ट्रसंघमा इरानका राजदूत अमिर सईद इरवानीले संयुक्त राष्ट्रसंघका महासचिव एन्टोनियो गुटेरेसलाई एउटा पत्र पठाएका छन् । उक्त पत्रमा यी पाँच देशहरूले अन्तर्राष्ट्रिय कानुन उल्लंघन गरेको उल्लेख गर्दै अब उनीहरूले इरानलाई भएको क्षतिको पूर्ण क्षतिपूर्ति दिनुपर्ने भनिएको छ ।
बीबीसी फारसीका अनुसार, इरवानीद्वारा लेखिएको यो पत्र समाचार एजेन्सी आईआरएनएले प्रकाशित गरेको हो ।
पत्रमा भनिएको छ, ‘यी पाँच देशहरूले अन्तर्राष्ट्रिय कानुन उल्लंघन गरेका छन् र इरानप्रति आफ्नो जिम्मेवारी पूरा गरेका छैनन् । त्यसैले अब उनीहरूको अन्तर्राष्ट्रिय जिम्मेवारी तय भइसकेको छ ।’ ‘उनीहरूले इरानलाई भएको सबै क्षतिको पूर्ण क्षतिपूर्ति दिनुपर्छ, जसमा भौतिक र मानसिक दुवै प्रकारका क्षति समावेश छन् ।’ यो पहिलो पटक होइन जब इरानले यस्तो माग गरेको हो । यसअघि पनि इरानले अमेरिकासँग युद्धमा भएको क्षतिको क्षतिपूर्ति माग गरेको थियो ।
