: सरकारले वार्षिक १ खर्बको डायस्पोरा बण्ड जारी गर्ने योजना अघि सारेको छ। गैर आवासीय नेपालीहरूलाई खास प्राकृतिक लगानीकर्ता (सुप्रिम अर्गानिक इन्भेष्टर) को स्थान दिई पूर्वाधार विकास र निर्यातमूलक उद्योगमा लगानी गर्न वार्षिक एक खर्बको डायस्पोरा बण्ड जारी गर्ने सरकारले योजना अघि सारेको हो।
आज सार्वजनिक गरिएको राष्ट्रिय प्रतिबद्धतामा उक्त कुराको उल्लेख गरिएको छ। सरकारले संवैधानिक र कानुनी व्यवस्था गरी गैर आवासीय नेपालीको नागरिकताको निरन्तरता, पैतृक सम्पत्ति र मतदानको अधिकार सुनिश्चित गरिने जनाएको छ । ‘एकपटकको नेपाली सधैंको नेपाली’लाई सुनिश्चित गरी विदेशमा रहेका नेपालीको ज्ञान, सीप र अनुभवलाई ब्रेन गेनको रूपमा प्रयोग गरिने राष्ट्रिय प्रतिबद्धतामा उल्लेख छ।
डायस्पोराको पुँजी र ज्ञान आकर्षित गरी अन्तर्राष्ट्रियस्तरको खेलकुद शहर, उच्च शिक्षा अनुसन्धान केन्द्र, विशिष्टिकृत स्वास्थ्य सेवा, सांस्कृतिक पर्यटन लगायतका क्षेत्रमा आयोजनाहरूको विविधीकरण गरिनुका साथै फास्ट ट्याक मोडेलमा निर्माण गरिनेछ।
विदेशमा बस्ने नेपालीहरूको लगानी प्रोत्साहन गर्न नेपालीहरूको ठूलो बसोबास भएका देशहरूसँग दोहोरो कर प्रणाली अन्त्य गर्न द्विपक्षीय सम्झौता गर्ने सरकारको योजना छ।
