: पाकिस्तानका प्रधानमन्त्री शहबाज सरिफ र इरानका राष्ट्रपति मसूद पेजेश्कियानबीच आइतबार साँझ टेलिफोन वार्ता भएको छ। पाकिस्तानको प्रधानमन्त्री कार्यालयले सामाजिक सञ्जाल एक्समार्फत दिएको जानकारी अनुसार, दुई नेताबीच करिब ४५ मिनेटसम्म वर्तमान क्षेत्रीय अवस्थाका बारेमा विस्तृत छलफल भएको थियो। सो क्रममा प्रधानमन्त्री सरिफले गत अप्रिल ११-१२ मा इस्लामाबादमा भएको वार्ताका लागि प्रतिनिधिमण्डल पठाएकोमा इरानी नेतृत्वलाई धन्यवाद व्यक्त गरे ।
प्रधानमन्त्री सरिफले इरानी राष्ट्रपतिलाई हालै साउदी अरब, कतार र टर्कीका नेताहरूसँग भएका भेटघाटबारे जानकारी गराए। यी भेटहरूले क्षेत्रमा स्थायी शान्तिका लागि कूटनीतिक प्रक्रियालाई अघि बढाउन मद्दत पुग्ने उनले बताए ।
पाकिस्तानले आफ्ना मित्र र साझेदार राष्ट्रहरूको सहयोगमा क्षेत्रीय शान्ति र सुरक्षाका लागि इमानदार प्रयास जारी राख्ने प्रतिबद्धता दोहोर्याएको बीबीसीले उल्लेख गरेकाे छ ।
राष्ट्रपति पेजेश्कियानले प्रधानमन्त्री सरिफ र फिल्ड मार्शल असिम मुनिरलाई धन्यवाद दिँदै शान्ति स्थापनाका लागि पाकिस्तानले गरिरहेको प्रयासको प्रशंसा गरे। साथै, आगामी दिनमा इरान र पाकिस्तानको सम्बन्ध अझ प्रगाढ हुने विश्वास समेत दिलाए।
अमेरिका र इरानबीच जारी तनाव अन्त्य गर्न पाकिस्तानले मध्यस्थकर्ताको भूमिका खेलिरहेको छ। यसअघि इस्लामावादमा एक चरणको वार्ता सम्पन्न भइसकेको छ। अमेरिकी राष्ट्रपति डोनाल्ड ट्रम्पले दोस्रो चरणको वार्ताका लागि पनि अमेरिकी प्रतिनिधिमण्डल इस्लामाबाद जाने बताएका छन्।
