— चीनको राजधानी बेइजिङमा आइतबार आयोजना भएको हाफ म्याराथनमा मानव आकारको (ह्युमनोइड) रोबटले प्रोफेसनल धावकलाई उछिन्दै दौड पूरा गरेको छ । करिब २१ किलोमिटर दूरीको उक्त दौड रोबटले करिब ५० मिनेट २६ सेकेन्डमा पूरा गरेको रोयटर्स, बीबीसीलगायत अन्तर्राष्ट्रिय सञ्चारमाध्यमहरूले जनाएका छन् । यो समय युगान्डाका धावक जेकब किप्लिमोले हाफ म्याराथनमा कायम गरेको ५७ मिनेट २० सेकेन्डको विश्व कीर्तिमानभन्दा झन्डै ७ मिनेटले छिटो हो ।
दौड जित्ने रोबट चिनियाँ स्मार्टफोन ब्रान्ड, अनरले विकास गरेको हो । 'जिङजे नम्बर वान' नामक उक्त रोबटमा आर्टिफिसियल इन्टेलिजेन्स (एआई)मा आधारित नेभिगेसन, मानवजस्तै खुट्टा र कुलिङ प्रणाली प्रयोग गरिएको थियो । यस वर्ष प्रतियोगितामा १०० भन्दा बढी रोबट टोली सहभागी थिए । अघिल्लो वर्ष पनि करिब २० टोलीले हाफ म्याराथ दौडिएका थिए । यसपाली सहभागीमध्ये ४० भन्दा बढी रोबटले कसैबाट निर्देशन नलिइकन स्वतन्त्र रूपमा दौड पूरा गरेका थिए भने बाँकी रोबट रिमोटमार्फत मानवले नै सञ्चालन रहेका थिए ।
सहभागी सबै रोबट स्थिर रूपमा दौडिन सकेका थिएनन् । सन्तुलन गुमाएर कतिपय बीचमै लडे केहीलाई पुनः उठेर दौडिन मानवीय सहयोग आवश्यक परेका भिडियोहरू अहिले सामाजिक सञ्चालमा छरपस्ट छन् । विजेता रोबटले भने सफलतापूर्वक दौड पूरा गरेको थियो ।
दौड मात्र होइन, चीनमा यस्ता रोबटहरू औद्योगिक निरीक्षण, गोदाम सञ्चालन, सार्वजनिक सेवा र मनोरञ्जन क्षेत्रमा समेत परीक्षण भइरहेका छन् । चीनले ह्युमानोइड रोबटलाई आफ्नो महत्वपूर्ण रणनीतिक उद्योगका रूपमा अघि बढाइरहेको छ । सन् २०२५ मा विश्वभर चल्तीमा आएका ह्युमानोइड रोबटमध्ये ८० प्रतिशतभन्दा बढी चीनमै प्रयोग भइरहेका छन् ।
रोयटर्सका अनुसार यो वर्ष मात्रै विश्वभर करिब १६ हजार युनिट ह्युमनोइड रोबट प्रयोगमा आएका थिए । एगीबट, युनिट्री रोबटिक्स, युबीटेक रोबटिक्सजस्ता चिनियाँ कम्पनीहरूले आक्रामक रूपमा उत्पादन विस्तार गरिरहेका छन् । एगीबट एउटै कम्पनीले मात्र गत वर्ष ५ हजार १ सयभन्दा बढी युनिट बजारमा पठाएको र विश्व बजारको करिब एक तिहाइ हिस्सा ओगटेको बताइएको छ । बजार विश्लेषकहरूले एआई र स्वचालित अन्य प्रविधिहरूको बजार बिस्तार हुँदै जाँदा आगामी दशकमा ह्युमानोइड रोबट उद्योग अर्बौं डलरको हुने अनुमान गरेका छन् ।
