: पाकिस्तानको इस्लामाबादमा वार्ताको तयारी भइरहेका बेला इरानी झण्डावाहक मालबहाक जहाजलाई अमेरिकाले नियन्त्रणमा लिएपछि इरानले ओमानको खाडीमा रहेका अमेरिकी सैन्य जहाजहरूमाथि ड्रोन आक्रमण गरेको छ।
इरानको अर्ध- सरकारी समाचार एजेन्सी तसनीमका अनुसार यी आक्रमणहरू गरिएका हुन्। यद्यपि, यी ड्रोन आक्रमणहरूबाट हालसम्म कुनै मानवीय वा भौतिक क्षतिको विवरण प्राप्त भएको छैन।
इरानको सबैभन्दा ठूलो सैन्य कमाण्ड एकाइ 'खातम अल-अनबिया सेन्ट्रल हेडक्वार्टर्स' ले यसअघि नै जवाफी कारबाहीको चेतावनी दिएको थियो। उसले अमेरिकी नौसेनाको कदमलाई युद्धविरामको उल्लंघन र 'सशस्त्र लुट' को संज्ञा दिँदै यसको कडा जवाफ दिने बताएको थियो।
अमेरिकी राष्ट्रपति डोनाल्ड ट्रम्पले अमेरिकी नौसैनिक नाकाबन्दी अन्तर्गत खाडीमा इरानी झण्डा भएको 'टोस्का नामक कार्गो जहाजलाई नियन्त्रणमा लिएको पुष्टि गरे।
'आज, इरानी झण्डा लगाइएको जहाज 'टोस्का' ले नौसैनिक नाकाबन्दी तोड्ने प्रयास गर्यो तर असफल भयो। यो जहाज ९०० फिट लामो छ र लगभग एउटा एयरक्राफ्ट क्यारियर जत्तिकै भारी छ।' ट्रम्पका अनुसार जहाजलाई रोकिन चेतावनी दिइएको थियो, तर त्यसलाई बेवास्ता गरेपछि अमेरिकी नौसेनाले जहाजको इन्जिन रूममा आक्रमण गरी त्यसलाई बीच समुद्रमै रोकेको हो।
अमेरिकी सेन्ट्रल कमाण्डले पछि एउटा भिडियो पनि जारी गरेको छ, जसमा नौसैनिक जहाजले कार्गो जहाजलाई रोकिरहेको देखिन्छ। यो तनावपूर्ण स्थिति ह्वाइट हाउसले इरानसँगको युद्ध समाप्त गर्ने विषयमा छलफल गर्न अमेरिकी उपराष्ट्रपति जेडी भेन्सले पाकिस्तानमा अर्को एउटा प्रतिनिधिमण्डलको नेतृत्व गर्ने पुष्टि गरेपछि अाएकाे हाे ।
तर, इरानले अहिलेसम्म यस वार्तामा सहभागी हुनेबारे कुनै आधिकारिक पुष्टि गरेको छैन। इरानी सरकारी सञ्चारमाध्यमका अनुसार, 'जबसम्म अमेरिकाको यो नाकाबन्दी जारी रहन्छ, इरानी अधिकारीहरू कुनै पनि वार्तामा सहभागी हुने छैनन्।'
