: युद्धविरामको समय सीमा सकिँदै गर्दा इरान–अमेरिकाबीचको सम्भावित दोस्रो चरणको वार्ताका विषयमा विश्वले चासो देखाइरहेको छ । अमेरिका र इरानबीचको सम्भावित दोस्रो चरणको वार्तालाई लिएर चीनले समेत चासो व्यक्त गरेको छ ।
अमेरिका–इरान शान्ति वार्ताको नयाँ चरणबारे उठेका सम्भावना र प्रश्नबीच पाकिस्तानका उपप्रधानमन्त्री इशाक डारले चीनका राजदूत जियाङ जायदोंगसँग भेट गरेका छन् । चीनले अमेरिका र इरानबीच शान्ति वार्ता अगाडि बढाउन पाकिस्तानले गरिरहेको प्रयासलाई ‘पूर्ण समर्थन’ दिएको पाकिस्तानको विदेश मन्त्रालयले बताएको छ । यसै क्रममा इरानका एक वरिष्ठ अधिकारीले पाकिस्तानमा अमेरिकासँग हुने सम्भावित वार्तामा सहभागी हुने विषयमा विचार भइरहेको बताएका छन् । तर, इरानभित्रै विभिन्न धारणा देखिएका छन् ।
इस्लामिक रिभोलुसनरी गार्ड कोर्प्ससँग सम्बन्धित समाचार अनुसार इरानले आफूले अमेरिका र इजराइललाई दबाबमा पारेको दाबी गरेको छ । अर्कोतर्फ, संसदका सभामुख मोहम्मद बाघेर गालिबाफले अमेरिकी राष्ट्रपति डोनाल्ड ट्रम्पको धम्कीबीच वार्ता स्वीकार नगर्ने बताएका छन् । यसअघि इरानको विदेश मन्त्रालयले भने अमेरिकासँग वार्तामा बस्नेबारे अझै कुनै अन्तिम निर्णय नभएको स्पष्ट पारेको छ ।
