: मोरङको विराटनगर महानगरपालिका-१२ स्थित एक होटलबाट ६ जना सिंगापुरका नागरिक पक्राउ परेका छन्। शंकास्पद गतिविधिमा संलग्न रहेको आरोपमा उनीहरूलाई प्रहरीले प्रारम्भिक अनुसन्धानका लागि पक्राउ गरेको हो।
धार्मिक प्रचारमा संलग्न रहेको भेटिएपछि नियन्त्रणमा लिएको प्रहरी स्रोतले जानकारी दिएको छ। पर्यटक भिसामा नेपाल आएका उनीहरूले विराटनगर क्षेत्रमा 'ताओइज्म' नामक धर्मको प्रचार गरेको भेटिएको छ। पर्यटक भिसाको दुरुपयोग गरी उनीहरू धर्म प्रचारमा संलग्न भएको अनुसन्धान संलग्न एक प्रहरी अधिकृतले अन्नपूर्णलाई बताए।
पक्राउ परेका ६ जनालाई नै प्रारम्भिक अनुसन्धानपछि प्रहरीले अध्यागमन विभागमा पठाएको छ। अध्यागमन विभागले नेपालमा उनीहरूको गतिविधिबारे थप अनुसन्धान गरिरहेको छ।
'भिसाको दुरुपयोग गरेको र गैरकानुनीरूपमा धर्मको प्रचार गरेको आरोपमा ६ जना सिंगापुरका नागरिक पक्राउ परेका छन्। उनीहरूलाई हामीले अध्यागमनमा बुझाएका छौं,' मोरङ प्रहरीले स्रोतले भन्यो।
नेपालको संविधान २०७२ को धारा २६ मा 'कसैको धर्म परिवर्तन गराउने वा अर्काको धर्ममा खलल पर्ने काम गराउन हुँदैन र त्यस्तो कार्य कानुन बमोजिम दण्डनीय हुनेछ' भन्ने उल्लेख छ। त्यस्तै मुलुकी अपराध संहितामा २०७४ मा पनि कसैलाई प्रलोभन, दबाब वा जबर्जस्ती गरेर धर्म परिवर्तन गराउन नपाइने व्यवस्था गरिएको छ।
के हो ताओइज्म?
ताओइज्म (ताओवाद) प्राचीन चीनमा विकसित भएको दार्शनिक तथा धार्मिक परम्परा हो। यसले मानव जीवनलाई प्रकृतिसँग सामञ्जस्यमा राखेर अघि बढ्न प्रेरित गर्छ। विश्वका प्रमुख दर्शनमध्ये ताओइज्मले सरलता, सन्तुलन र स्वाभाविक जीवनशैलीलाई प्राथमिकतामा राख्छ। तर, सामाजिक संरचना र प्रणालीमाथि भने यसले ठूलो आघात पुर्याउने र सामाजिक सद्भाव खलबल्याउने जानकारहरू बताउँछन्।
संसारका सबै वस्तु र घटनाहरू कसरी स्वाभाविक रूपमा सञ्चालन हुन्छन् भन्ने नै यसको आधारभूत सिद्धान्त हो। यसले समाजको तहगत संरचनालाई बिगार्ने सम्भावना रहेको यसका जानकारहरू बताउँछन्। त्यसैले यसले समाजको तहगत संरचनाको विश्वास नगर्ने उनीहरूको दाबी छ।
मानिसले काम गर्दा अनावश्यक दबाब वा नियन्त्रणको प्रयास नगरी स्वाभाविक ढंगले अघि बढ्नुपर्ने यस दर्शनको सिद्धान्त हो। यसले जीवनलाई सहज र सन्तुलित बनाउने विश्वास राख्छ। यस दर्शनले समाजको सन्तुलन बिगार्ने र समाजलाई भड्काउने उद्यत रहेको पनि विश्लेषकहरूको दाबी छ।
ताओइज्म मुख्यतः चीन, ताइवान, हङकङ, जापान, भियतनाम, दक्षिण कोरियाका नागरिकहरूले अंगालेका छन्। यो धर्मलाई पछिल्लो समय अन्य देशहरूमा पनि प्रचार गरिएको पाइएको छ।
