: झापाको कनकाईमा अटो र मोटरसाइकल एकापसमा ठोकिँदा एक महिलाको मृत्यु भएको छ भने ६ जना घाइते भएका छन्। पूर्व–पश्चिम राजमार्ग अन्तर्गत कनकाई नगरपालिका–३ नयाबस्तीमा आज बिहान करिब साढे ११ बजेको समयमा बिर्तामोडबाट सुरुङ्गातर्फ जाँदै गरेको प्र १–०१–००१ ह ८२५२ नम्बरको अटो अनियन्त्रित भई विपरीत दिशाबाट आउँदै गरेको मे ५ प ६६२० नम्बरको मोटरसाइकलमा ठोकिँदा दुर्घटना भएको थियो।
दुर्घटनामा अटोमा सवार हल्दिबारी गाउँपालिका–३ निवासी ६८ वर्षीया मञ्जुधरी ढकाल गम्भीर घाइते भएकी थिइन्। उनको बिर्तामोडस्थित बीएण्डसी अस्पतालमा उपचारका क्रममा दिउँसो ४:३५ बजे मृत्यु भएको जिल्ला प्रहरी कार्यालय झापाले जनाएको छ।
त्यस्तै अटोमा सवार हल्दिबारी गाउँपालिका–३ का ५७ वर्षीय जीवन ढकाल, सोही ठाउँका ५० वर्षीया हरिमाया ढकाल, ३५ वर्षीया भिमा ढकाल, १३ वर्षीय रोजन ढकाल, १३ वर्षीय प्रदीप नेपाल र मोटरसाइकल चालक मोरङ मिक्लाजुङ–६ का ३७ वर्षीय चन्द्रबहादुर खत्री घाइते भएका छन्। उनीहरूको बीएण्डसी अस्पताल बिर्तामोडमा उपचार भइरहेको छ।
अधिकांशको अवस्था मध्यमदेखि सामान्य रहेको बताइएको छ। इलाका प्रहरी कार्यालय सुरुङ्गाले दुर्घटनामा संलग्न अटो, मोटरसाइकल र अटो चालक हल्दिबारी–३ का ४६ वर्षीय खेमराज गौतमलाई नियन्त्रणमा लिएको छ।
