: नेपाली कम्युनिष्ट पार्टी (नेकपा) का सहसंयोजक माधव नेपालले सिङ्गो देशको राजनीति अहिले अन्योलतामा अगाडि बढिरहेको बताएका छन् । पार्टी कार्यालय पेरिसडाँडामा आयोजित कम्युनिष्ट पार्टीको ७७ औ स्थापना दिवस कार्यक्रमलाई सम्बोधन गर्दै पूर्व प्रधानमन्त्री समेत रहेका सहसंयोजक नेपालले कम्युनिष्ट पार्टीहरुले आ–आफ्नो पार्टीको समीक्षा गर्न आवश्यक रहेको बताए ।
उनले आफूहरुले हेर्दाहेर्दै कम्युनिष्ट आन्दोलन ओरालो लागेको समेत बताए । सहसंयोजक नेपालले यस पटकको निर्वाचनमा अप्रत्याशित परिणाम सामना गर्दै ठूलो धक्का खानु परेको बताएका छन् । उनले भर्खरैको निर्वाचन परिणाम र कम्युनिष्ट पार्टीहरुले खाएको धक्का र कमजोरीहरुको खुलस्त छलफल गर्नुपर्ने बताए । उनले हार हुने वितिक्कै आत्तिनेहरुले जित हासिल गर्न नसक्ने बताए ।
उनले जितका लागि फेरि नयाँ शिराबाट उठेर अगाडि बढ्नु पर्ने बताए । उनले मुलुक अहिले जुन हिसावले चलिरहेको छ त्यसले गम्भिर प्रश्न खडा गरिरहेको बताए । उनले यो सरकारले जनताको आवध्यकता र देशको हितमा आफूलाई अगाडि बढाउन सक्छ कि सक्दैन भन्ने प्रश्न खडा भएको बताए । उनले विगतको कम्युनिष्ट विरासतलाई सम्झिँदै आत्मबलसहित फेरि अगाडि बढ्नु पर्ने बताए । उनले नेपालको वर्तमान राजनीतिक अवस्था अत्यन्त संकट र चुनौतीपूर्ण रहेको बताएका छन् । हाल देशको राजनीतिक अवस्था चुनौतीपूर्ण भए पनि भविष्य सम्भावनाले भरिएको पनि रहेको बताए ।
