: युक्रेनमाथि रुसले रातभरि गरेको भीषण आक्रमणमा कम्तीमा ७ जनाको मृत्यु भएको छ। मध्य युक्रेनको निप्रो सहरमा ५ जनाको ज्यान गएको पुष्टि भएको छ। त्यहाँको एउटा अपार्टमेन्टमा प्रहार भएको अधिकारीहरूले जनाएका छन्।
युक्रेनी राष्ट्रपति भोलोदिमिर जेलेनेस्कीले उक्त आक्रमण करिब रातभरि नै जारी रहेको बताएका छन्। शनिबार बिहानसम्म पनि उद्धारकर्मीहरू निप्रोमा भग्नावशेष मुनि जीवित मानिसको खोजीमा खटिरहेका थिए।
आक्रमणको क्रममा रूसी ड्रोन सीमातर्फ आउँदै गर्दा रोमानियामा तैनाथ बेलायती लडाकु विमानहरू पनि सतर्कताका लागि उडाइएको थियो। तर, बेलायतको रक्षा मन्त्रालयले ती विमानले कुनै ड्रोन खसालेको भन्ने समाचारलाई अस्वीकार गरेको छ।
यसैबीच, युक्रेनले पनि रुसको भित्री भूभागमा लामो दूरीका ड्रोन आक्रमण गरेको जनाएको छ। रूसको एकाटेरिनबर्ग सहरमा एक भवनमा आक्रमण हुँदा ६ जना घाइते भएका छन् भने नजिकैको चेल्याबिन्स्कमा औद्योगिक केन्द्र लक्षित ड्रोनहरूलाई रोकिएको स्थानीय अधिकारीहरूले
बताएका छन्।
रुसी मिसाइल र ड्रोनहरूले उत्तरी सहर चेर्निहिभमा पनि आक्रमण गरेका छन्। आक्रमणमा परी दुई जनाको मृत्यु भएको पुष्टि भएको छ। साथै ओडेसा र खार्किभ सहरहरू पनि निसानामा परेका छन्।
युक्रेनी अधिकारीहरूले रुसले पठाएका ६ सयभन्दा बढी ड्रोनमध्ये अधिकांशलाई निष्क्रिय बनाइएको दाबी गरेका छन्। जुन पछिल्ला दिनहरूमा सबैभन्दा ठूलो आक्रमणमध्ये एक मानिएको छ। राष्ट्रपति जेलेनेस्कीले सामाजिक सञ्जालमा लेख्दै भनेका छन्, ‘रूसको रणनीति परिवर्तन भएको छैन–ड्रोन, क्रुज मिसाइल र ब्यालिस्टिक हतियार प्रयोग गर्दै सहरका सामान्य संरचनालाई लक्षित गरिन्छ।’
रुसको रक्षा मन्त्रालयले भने १२ भन्दा बढी क्षेत्रहरूमा १२७ वटा ड्रोन खसालिएको दाबी गरेको छ। साथै, खार्किभ क्षेत्रमा पर्ने बोच्कोभे गाउँ आफ्नो नियन्त्रणमा आएको पनि दाबी गरेको छ। यद्यपि युक्रेनले यसबारे कुनै प्रतिक्रिया दिएको छैन।
रोमानियाले पनि आफ्नो सीमामा कुनै अज्ञात वस्तु खसेको घटनाको अनुसन्धान गरिरहेको जनाएको छ। उसले बेलायती विमानहरूले कुनै ड्रोन नखसालेको स्पष्ट पारेको छ।
रुस–युक्रेनबीच शान्ति वार्ता ठप्प भइरहेका बेला युक्रेनले अन्तर्राष्ट्रिय समर्थन खोज्ने प्रयास जारी राखेको छ। शुक्रबार राष्ट्रपति जेलेनेस्कीले साउदी अरेबियाका राजकुमार मोहम्मद बिन सल्मानसँग भेटवार्ता गरेका छन्। उक्त भेटमा हवाई प्रतिरक्षा सहकार्य र संयुक्त सैन्य उत्पादनबारे छलफल भएको जनाइएको छ।
