: इरानी विदेशमन्त्री अब्बास अराघची र पाकिस्तानका फिल्ड मार्सल असिम मुनीरबीच भेटवार्ता भएको छ। अराघची शुक्रबार र शनिबारको मध्यरातमा इस्लामाबाद आइपुगेका हुन्।
उनको यस भ्रमणका क्रममा अमेरिकासँगको बैठकको कुनै औपचारिक योजना भने प्रस्ताव गरिएको छैन्। अराघचीले शुक्रबार 'एक्सु (ट्विटर) मा एक पोस्ट गर्दै पाकिस्तानको भ्रमणपछि आफू ओमान र रुसको यात्रामा जाने जानकारी दिएका थिए।
इरानी सरकारी ब्रोडकास्टरले टेलिग्राममार्फत विदेशमन्त्री अराघचीको पाकिस्तानमा अमेरिकी प्रतिनिधिहरूसँग भेट्ने कुनै योजना नरहेको स्पष्ट पारेको छ। ब्रोडकास्टरका अनुसार, पाकिस्तानले एक 'पुलको भूमिका निर्वाह गर्न सक्छ र 'द्वन्द्व अन्त्यका लागि इरानका विचारहरू अगाडि बढाउनू मद्दत गर्न सक्छ।
यसअघि ह्वाइट हाउसले आफ्ना विशेष दूत स्टिभ विटकफ र जेरेड कुश्नरलाई इस्लामावाद पठाउन लागेको बताएको थियो। इरानले 'आमने-सामने' कुराकानी गर्न चाहेकाले उनीहरूलाई पठाउन लागिएको दाबी गरिएको थियो।
पाकिस्तानी अधिकारीहरू र इरानी दूतावासका अनुसार इरानी दूतावासले यो भ्रमण इरान र पाकिस्तानबीचको 'द्विपक्षीय मामिलाहरूको समीक्षा'का लागि भएको बताएको छ। एबीसी न्यूजले पाकिस्तान सरकारका एक वरिष्ठ अधिकारीलाई उद्धृत गर्दै जनाएअनुसार, अमेरिकी र इरानी प्रतिनिधिमण्डलले यस सप्ताहान्तमा पाकिस्तानी अधिकारीहरूसँग छुट्टाछुट्टै भेटवार्ता गर्नेछन्।
यदि यी छुट्टाछुट्टै भेटवार्ताहरू सकारात्मक रहेमा, आइतबार अमेरिकी र इरानी अधिकारीहरूबीच प्रत्यक्ष भेटवार्ता हुन सक्ने रिपोर्टमा उल्लेख छ।
