: गाजातर्फ राहत सामग्री लिएर जाँदै गरेको ग्लोबल सुमूद फ्लोटिला (जीएसएफ) का २२ वटा डुङ्गाहरूलाई इजरायली सेनाले ग्रीसको क्रेट टापु नजिकै अन्तर्राष्ट्रिय जलक्षेत्रमा रोकेर नियन्त्रणमा लिएको छ।
प्यालेस्टाइन समर्थक अभियन्ताहरूले इजरायली सेनाको यस कदमलाई डकैतीको संज्ञा दिएका छन्। आयोजकहरूका अनुसार गाजाबाट ९६५ किलोमिटरभन्दा बढीको दूरीमा रहेका मानिसहरूलाई इजरायलले गैरकानूनी रूपमा हिरासतमा लिएको हो। गाजामा इजरायलले लामो समयदेखि समुद्री नाकाबन्दी गर्दै आएको छ।
इजरायली विदेश मन्त्रालयले उक्त अभियानलाई पीआर स्टन्ट (प्रचारवाजी)को संज्ञा दिँदै करिब १७५ जना अभियन्ताहरूलाई हिरासतमा लिएको पुष्टि गरेको छ। इजरायली विदेशमन्त्री गिडियन सारले हिरासतमा लिइएका व्यक्तिहरूलाई बिहीबार ढिलो गरी 'ग्रीसको एउटा समुद्री तटमा उतारिने' जानकारी दिएका छन्।
जीएसएफका अनुसार, यस फ्लोटिलामा रहेका बाँकी ३६ डुङ्गाहरूमध्ये अधिकांश अहिले क्रेटको दक्षिणी तट नजिकै रहेका छन्। यो अभियान दुई हप्ताअघि स्पेन, फ्रान्स र इटालीबाट सुरु भएको थियो, जसमा कुल ५८ जहाजहरू सहभागी थिए। यसको मुख्य उद्देश्य गाजामा इजरायलले लगाएको नाकाबन्दी तोड्नु र राहत पुर्याउनु रहेको बताइएको छ।
