: अमेरिका–इजरायलले इरानविरुद्ध गरेको युद्धका क्रममा कम्तीमा ४४ जना इरानी समुद्री कामदार मारिएका छन् । इरानको मरिन युनियनका अनुसार युद्धका क्रममा २९ जना घाइते भएका छन् ।
इरानी मर्चेन्ट म्यारिनर्स सिन्डिकेटका महासचिव समन रेजाइले फेब्रुअरी २८ देखि अप्रिल १ बीच २२ जना नाविक, १६ जना माछा मार्ने कामदार र ६ जना बन्दरगाह कामदार मारिएको जानकारी दिएका छन् । रेजाइका अनुसार मृतकहरूको सूची इरान पोट्र्स एन्ड म्यारिटाइम अर्गनाइजेसन र उनको युनियनका सदस्यहरूले तयार पारेका हुन् । उनले भने अनुसार यो सूचीमा अमेरिकी र इजरायली सेनाद्वारा मारिएका इरानी नौसेनाका सदस्यहरू समावेश छैनन् ।
रेजाइले मार्च र अप्रिल महिनामा संयुक्त राष्ट्रसंघको अन्तर्राष्ट्रिय समुद्री संगठनमा उजुरी पत्र पठाउँदै इरानका बन्दरगाह र व्यापारिक जहाजहरूमा अमेरिकी र इजरायली सेनाले गरेका आक्रमणका कारण यी मृत्यु भएको दाबी गरेका छन् । उनका पत्र अनुसार कम्तीमा २९ जना घाइते भएका छन् र ९ जना बेपत्ता छन् । युनियन अन्तर्राष्ट्रिय यातायात कामदार महासंघसँग आबद्ध छ र इरानी जहाज कम्पनीहरूसँग वार्तामा कामदारहरूको प्रतिनिधित्व गर्छ । युद्ध सुरु भएदेखि यसले फसेका समुद्री कामदारहरूलाई मानवीय, चिकित्सकीय र स्वदेश फर्काउने सहायता पनि प्रदान गरिरहेको छ ।
रेजाइले भने, ‘मानवीय संकटले पर्सियन खाडीका सबै समुद्री कामदारहरूलाई असर गरिरहेको छ, जसमा इरानी झण्डा बोकेका जहाजका कर्मचारी पनि पर्छन् । तर उनीहरूले विशेष रूपमा डरलाग्दो र कठिन परिस्थितिको सामना गरिरहेका छन् ।’ उनका अनुसार समुद्री कामदारहरू केवल आपूर्ति अभावको चिन्तामा मात्र छैनन्, उनीहरूले ६० दिनसम्म युद्ध क्षेत्रभित्र फसेपछि गम्भीर मानसिक तनाव पनि भोगिरहेका छन् ।
स्वतन्त्र द्वन्द्व अनुगमन संस्थाका अनुसार फेब्रुअरी २८ यता अमेरिकी र इजरायली सेनाले इरानभर ३,००० भन्दा बढी हवाई आक्रमण गरेका छन्, जबकि इरानले मध्यपूर्वभर करिब १,६०० प्रतिकारात्मक आक्रमण गरेको छ । अप्रिल ८ देखि अमेरिका–इरानबीच युद्धविराम लागू भए पनि, अप्रिल १३ मा अमेरिकाले इरानी बन्दरगाहहरूमा नौसैनिक नाकाबन्दी लगाएको छ, जसको उद्देश्य इरानको तेल निर्यात रोक्नु र तेहरानलाई होर्मुज जलडमरूमध्य पुनः खोल्न दबाब दिनु हो ।
सामान्यतया विश्वको पाँचौँ भाग ऊर्जा र ग्यास यही जलमार्गबाट जाने गर्छ, तर युद्ध सुरु भएदेखि यो मार्ग व्यवहारिक रूपमा बन्द छ । यसका कारण कम्तीमा दुई महिनादेखि २० हजार समुद्री कामदारहरू त्यहाँ फसेका छन् । युद्धविराम भए पनि इरानी सेनाले होर्मुज जलडमरूमध्य छोड्न खोज्ने जहाजहरूमा गोली चलाइरहेको छ र अप्रिल २२ मा पनामा र लाइबेरियाको झण्डा बोकेका दुई कार्गो जहाज कब्जा गरेको छ ।
अर्कोतर्फ, अमेरिकाले अप्रिल १९ मा ओमानको खाडीमा इरानी झण्डा बोकेको जहाज कब्जा गरी त्यसका चालक दललाई नियन्त्रणमा लिएको थियो । अमेरिकी सेनाको केन्द्रीय कमाण्डले उक्त जहाजले नाकाबन्दी उल्लंघन गरेको आरोप लगाएको छ । इरानले खाडी क्षेत्रमा वा होर्मुज जलडमरूमध्य पार गर्न खोज्ने जहाजहरूमा गरेको आक्रमणका कारण पनि कम्तीमा १० जना समुद्री कामदार मारिएका छन् ।
