: इरानले अमेरिकासँग वार्ताका लागि पाकिस्तानमार्फत नयाँ प्रस्ताव पठाएको छ । तर अमेरिकी राष्ट्रपति डोनाल्ड ट्रम्प भने इरानको यस नयाँ प्रस्तावबाट सन्तुष्ट छैनन् । ‘युद्धविरामका कारण इरानविरुद्धको ‘अभियान समाप्त’ भएको तर युद्ध जारी राख्न आफूलाई अमेरिकी कांग्रेसको स्वीकृति आवश्यक नपर्ने बताएका छन्।
हाउस स्पीकर माइक जोन्सन र कार्यवाहक सीनेट अध्यक्ष चक ग्रास्लीलाई लेखेको पत्रमा ट्रम्पले भनेका छन्, ‘७ अप्रिल २०२६ पछि अमेरिकी र इरानी सेनाबीच कुनै गोलीबारी भएको छैन । २८ फेब्रुअरी २०२६ मा सुरु भएको शत्रुता समाप्त भएको छ ।’ तर यो नयाँ भनाइ ट्रम्पले केही घण्टा अघि दिएका अभिव्यक्तिसँग मेल खाँदैन, जहाँ उनले अमेरिका इरानको मुद्दाबाट ‘चाँडै पछि नहट्ने’ बताएका थिए ।
यसबीच, इरानका विदेश मन्त्री अब्बास अराघचीले युद्धका कारण अमेरिकालाई १०० अर्ब डलरको नोक्सानी भएको दावी गरेका छन् । तर पेन्टागनका अधिकारीहरूले २९ अप्रिलमा अमेरिकी कांग्रेसमा दिएको जानकारी अनुसार, इरानसँगको युद्धमा अमेरिकाले करिब २५ अर्ब डलर खर्च गरेको छ ।
इरान र अमेरिका–इजरायलबीच करिब पाँच हप्ता चलेको युद्धका क्रममा दुई हप्ताको युद्धविराम गरिएको थियो, जसको म्याद पहिले २२ अप्रिलसम्म थियो र पछि फेरि थपिएको थियो । युद्ध अन्त्य गर्न पाकिस्तानको मध्यस्थतामा एक पटक वार्ता भइसकेको छ, तर त्यो असफल भएको थियो । दोस्रो चरणको वार्ताका लागि न इरानले न त ट्रम्पले आफ्ना दूतहरू पाकिस्तान पठाएका छन् ।
