: जेलमा रहेकी इरानकी मानवअधिकार अभियन्ता तथा सन् २०२३ की नोबेल शान्ति पुरस्कार विजेता नर्गेस मोहम्मदीको स्वास्थ्य अचानक रुपमा बिग्रिए गम्भीर भएपछि अस्पताल भर्ना गरिएको छ । मोहम्मदी दुई पटक पूर्णरूपमा होस गुमाउने अवस्थामा पुगेको र मुटुसम्बन्धी गम्भीर संकट (कार्डियाक क्राइसिस) देखिएको उनको फाउन्डेसनले जनाएको छ ।

‘जेलका चिकित्सकहरूले उनको अवस्था त्यहीँ नियन्त्रण गर्न नसकिने निष्कर्ष निकालेपछि यो स्थानान्तरण अपरिहार्य बनेको हो । यसअघि नै उनलाई तेहरानस्थित विशेषज्ञ चिकित्सक टोलीबाट उपचार गरिनुपर्ने सिफारिस गरिएको थियो’, नर्गेस मोहम्मदी फाउन्डेसनले भनेको छ ।

फाउन्डेसनका अनुसार शुक्रबार यसअघि, उत्तर–पश्चिमी इरानको जान्जानस्थित जेलमा मोहम्मदी दुई पटक बेहोस भएकी थिइन् । उनका वकिलहरूका अनुसार, मार्च महिनाको अन्त्यतिर उनलाई मुटुघात भएको हुनसक्ने अनुमान गरिएको छ । उक्त घटनापछि केही दिनमै भेट्न जाँदा उनी निकै फिक्का, दुब्लिएकी र हिँड्न समेत नर्सको सहयोग आवश्यक पर्ने अवस्थामा देखिएकी थिइन् ।

‘ज्यान जोखिममा पार्ने दुर्व्यवहार’
५३ वर्षीया मोहम्मदीलाई डिसेम्बर १२ मा पूर्वी इरानको मशहद सहर भ्रमणका क्रममा पक्राउ गरिएपछि जेलमा राखिएको छ । फेब्रुअरीमा उनलाई सात वर्षभन्दा बढी जेल सजाय सुनाइएको थियो । उनका वकिलका अनुसार, त्यसमध्ये छ वर्षको सजाय ‘अपराध गर्नका लागि जमघट र षड्यन्त्र गरेको’ आरोपमा दिइएको हो । उनको परिवारले फेब्रुअरीमै जेलमा उनको स्वास्थ्य झन् बिग्रिँदै गएको जनाएको थियो, जसको एक कारण डिसेम्बरमा पक्राउका बेला उनीमाथि भएको भनिएको कुटपिट पनि रहेको उनीहरूको दाबी छ । परिवारका अनुसार, केही पुरुषहरूले उनलाई पेट, टाउको र घाँटीमा प्रहार गरेका थिए ।


नोबेल समितिले फेब्रुअरीमा जारी गरेको विज्ञप्तिमा मोहम्मदीमाथि भइरहेको ‘ज्यान जोखिममा पार्ने निरन्तर दुर्व्यवहार’ को निन्दा गरेको थियो । इरानी सरकारले उक्त कथित आक्रमणबारे कुनै प्रतिक्रिया दिएको छैन । डिसेम्बरमा पक्राउ हुनुअघि पनि मोहम्मदी राज्यविरुद्ध षड्यन्त्र र सरकारविरुद्ध प्रचार गरेको आरोपमा १३ वर्ष ९ महिनाको सजाय भोगिरहेकी थिइन् । तर स्वास्थ्य समस्याका कारण २०२४ को अन्त्यदेखि उनलाई अस्थायी रूपमा रिहा गरिएको थियो ।