: मध्यविन्दुको राइनो रंगशालामा जारी राइनो संरक्षण गोल्डकपमा आयोजक राइनो क्लबले सानदार जित दर्ता गर्दै सेमिफाइनलमा प्रवेश गरेको छ। शनिबार सम्पन्न अन्तिम क्वार्टरफाइनल खेलमा पाहुना टोली एबीएफसी कोलकाता (भारत) लाई २-० गोल अन्तरले स्तब्ध पार्दै आयोजक राइनो क्लब सेमिफाइनलमा प्रवेश गरेको हो।
अत्यन्तै आक्रामक र प्रतिस्पर्धात्मक शैलीमा खेलिएको उक्त खेलको पहिलो हाफ गोलरहित बराबरीमा सकिएको थियो। दुवै टोलीले सुरुवाती समयमा रक्षात्मक खेल प्रदर्शन गरे पनि दोस्रो हाफमा आयोजक टोलीले आक्रामक रणनीति अपनाउँदै दुई गोल गर्न सफल भयो।
राइनो क्लबका लागि विकि चाम्लिङ राई र कृष्ण आलेले समान एक-एक गोल गर्दै टोलीको जित सुनिश्चित गरे। खेलमा उत्कृष्ट प्रदर्शन गरेका आयोजक राइनो क्लबका कृष्ण आले 'म्यान अफ द म्याच' घोषित भए।
प्रतियोगिता अन्तर्गत आइतबार हुने पहिलो सेमिफाइनल खेलमा दुई विभागीय टोलीहरू नेपाल पुलिस क्लब र सशस्त्र प्रहरी बल एफसी बीच प्रतिस्पर्धा हुनेछ। राइनो क्लबका अध्यक्ष दोमन भण्डारीका अनुसार प्रतियोगिताको विजेताले नगद ८ लाख र उपविजेताले ४ लाख रुपैयाँसहित ट्रफी, मेडल र प्रमाणपत्र प्राप्त गर्नेछन्। गोल्डकपको फाइनल खेल यही वैशाख २३ गते हुनेछ।
