: अमेरिकाले जर्मनबाट आफ्ना पाँच हजार सैनिक फिर्ता गर्ने घोषणा गरेको छ । इरानसँगको युद्धको विषयलाई लिएर बिच्किएको अमेरिकाले जर्मनीमा खटिएका आफ्ना सैनिकमध्ये पाँच हजारलाई फिर्ता गर्ने घोषणा गरेको हो । अमेरिकी रक्षा विभागले जर्मनीबाट सैनिक फिर्ता लिने योजना बनाएको हो । यो निर्णय अमेरिकी राष्ट्रपति डोनाल्ड ट्रम्प र जर्मन चान्सलर फ्रिड्रिख मेर्जबीच इरानसँगको युद्धलाई लिएर भएको विवादपछि आएको हो।
यो निर्णय ट्रम्पले मेर्जको आलोचना गरेको एक दिनपछि आएको हो । मेर्जले अमेरिकालाई इरानी वार्ताकारहरूले ‘अपमानित’ बनाएको टिप्पणी गरेका थिए । गत डिसेम्बरसम्म जर्मनीभर रहेका विभिन्न सैन्य अड्डाहरूमा ३६ हजार बढी सक्रिय अमेरिकी सैनिक तैनाथ थिए, जसले त्यहाँ अमेरिकाको ठूलो सैन्य उपस्थिति देखाउँछ ।
जर्मनीका रक्षा मन्त्री बोरिस पिस्टोरियसले भनेका छन्, ‘युरोपमा, विशेषगरी जर्मनीमा अमेरिकी सैनिकहरूको उपस्थिति हाम्रो र अमेरिकाको दुवै हितमा छ ।’ तर उनले यो निर्णय अप्रत्याशित नभएको पनि स्पष्ट पारे । उनका अनुसार अमेरिका युरोप तथा जर्मनीबाट सैनिक फिर्ता लिने सम्भावना ‘पहिले नै देखिएको’ थियो ।
युरोपमा अमेरिकाको सबैभन्दा ठूलो सैन्य तैनाथी जर्मनीमै छ । इटालीमा करिब १२ हजार र बेलायतमा करिब १० हजार अमेरिकी सैनिक रहेका छन् । धेरै सैनिकहरू जर्मनीको दक्षिण–पश्चिमी शहर कैसरस्लाउटर्न नजिकको रामस्टाइन एयर बेसमा तैनाथ छन् । ट्रम्पले यसअघि पनि जर्मनीबाट अमेरिकी सैनिक घटाउने प्रस्ताव गरेका थिए, तर ती अहिलेसम्म कार्यान्वयनमा आएका थिएनन् । जापान बाहेक अमेरिकाको सबैभन्दा ठूलो सैन्य उपस्थिति जर्मनीमै छ । सन २०२० मा जर्मनीबाट १२ हजार सैनिक अन्य नाटो देशहरूमा वा अमेरिकामा फिर्ता लैजाने प्रस्ताव अमेरिकी संसद (कङ्ग्रेस) ले रोकेको थियो र पछि राष्ट्रपति जो बाइडेनले त्यसलाई उल्ट्याएका थिए ।
