: इन्धन संकटका कारण अमेरिकाको ‘स्पिरिट एयरलाइन्स’ को सेवा बन्द भएपछि यात्रुहरु अलपत्र परेका छन् । शनिबार छुट मूल्यको सेवा दिने स्पिरिट एयरलाइन्सले अचानक सञ्चालन बन्द गरेपछि अलपत्र परेका यात्रुहरू र प्रभावित कर्मचारीहरूको अवस्थालाई सम्हाल्न अमेरिकी एयरलाइन्स र सरकारी अधिकारीहरूबीच खिचातानी भएको छ । सस्तो उडान सेवा दिने उक्त कम्पनीको पतनबारे राजनीतिक र व्यावसायिक आरोप–प्रत्यारोप पनि सुरु भयो ।
‘यदि तपाईंको स्पिरिट एयरलाइन्ससँग उडान तय भएको छ भने विमानस्थल नजानुहोस्; यहाँ तपाईंलाई सहयोग गर्ने कोही हुने छैन’, अमेरिकी यातायात सचिव सिन डफीले चेतावनी दिए । उनले फ्लोरिडामा आधारित कम्पनीसँग टिकट लिएका ग्राहकहरूले कसरी फिर्ता रकम पाउने वा अन्य एयरलाइन्समा सहुलियत दरमा टिकट लिन सक्ने उपायहरू पनि बताएका छन् ।
शनिबार देशभरका विमानस्थलहरूमा स्पिरिटका चेक–इन काउन्टरहरू खाली देखिएका थिए । कम्पनीले मध्यरातपछि सञ्चालन बन्द गरेको र आफ्नो वेबसाइटमा ३४ वर्षको उडानपछि ‘तुरुन्तै प्रभावकारी हुने गरी व्यवस्थित रूपमा सेवा बन्द गर्ने प्रक्रिया सुरु गरिएको’ जनाएको थियो । ओरलान्डो अन्तर्राष्ट्रिय विमानस्थलमा रातभर डिजिटल प्रस्थान बोर्डमा स्पिरिटका उडानहरू रद्द भएको संकेत दिने रातो सूचनाहरू भरिएका थिए । अन्तिम उडान टेक्सासको डलासमा मध्यरातपछि अवतरण गरेसँगै आकाशमा स्पिरिटका पहेंलो रंगका विमानहरू देखिन छाडेका थिए । सरकारी उद्धारको प्रयास असफल भएपछि कम्पनी व्यवस्थापनले यही अन्तिम निर्णय गरेको हो ।
स्पिरिटका अध्यक्ष तथा प्रमुख कार्यकारी अधिकृत डेभ डेविसले यात्रुहरूलाई यसरी अलपत्र पार्ने आफूहरुको उद्देश्य नभएको बताएका छन् । ‘हामीले यहाँ रहने छैनौँ भन्ने सोचेर टिकट बेचेनौं’, उनले भने । ‘हामीले आवश्यक वित्तीय सहयोग प्राप्त गर्नेछौँ भन्ने विश्वास गरेका थियौं ।’ यसबीच राजनीतिक आरोप–प्रत्यारोप पनि चर्किएको छ ।
यातायात सचिव डफीले इरानसँगको युद्धका कारण जेट इन्धनको मूल्य बढ्नु नै कम्पनीको पतनको कारण नभएको बताए । उनका अनुसार कम्पनी पहिलेदेखि नै गम्भीर आर्थिक समस्यामा थियो । रिपब्लिकन पक्षले भने बाइडेन प्रशासनतर्फ औंला उठाएको छ । सरकारले स्पिरिटलाई जेटब्लूसँग ३.८ अर्ब डलरमा बेच्ने प्रस्तावको विरोध गरेको थियो, जसले हवाई भाडा बढ्न सक्ने भन्दै २०२४ मा संघीय अदालतले उक्त सम्झौता रोकेको थियो ।
