: अमेरिकी राष्ट्रपति डोनाल्ड ट्रम्पले गरेको सेना फिर्ताको घोषणालाई जर्मनीले अस्वभाविक निर्णय नभएको प्रतिक्रिया दिएको छ । जर्मनीका रक्षामन्त्री बोरिस पिस्टोरियसले अमेरिकाले आफ्नो देशबाट ५,००० सैनिक फिर्ता गर्ने निर्णय ‘पहिल्यै अनुमान’ गरिएको बताएका छन् । उनले युरोपमा, विशेष गरी जर्मनीमा, अमेरिकी सैनिकको उपस्थिति जर्मनी र अमेरिका दुवैका लागि महत्वपूर्ण रहेको पनि बताएका छन् ।
नाटोकी प्रवक्ता एदिसन हार्टले भने यस निर्णयबारे विस्तृत जानकारी बुझ्न अमेरिकासँग समन्वय भइरहेको बताएकी छन् । अमेरिकी राष्ट्रपति ट्रम्पले शनिबार राति भनेका थिए, ‘हामी सेनाको संख्या धेरै घटाउनेछौं, ५,००० भन्दा पनि बढी घटाउने छौं ।’ यो निर्णय ट्रम्पले जर्मन चान्सलर फ्रिडरिख मर्जको आलोचनापछि आएको हो । मर्जले इरानसँग भइरहेको वार्तामा अमेरिका ‘अपमानित’ भएको बताएका थिए ।
हाल जर्मनीमा करिब ३६ हजार बढी अमेरिकी सैनिक तैनाथ छन्, जुन युरोपमा सबैभन्दा ठूलो संख्या हो । यसको तुलनामा इटालीमा करिब १२ हजार र बेलायतमा १० हजार सैनिक छन् । ट्रम्पले इटाली र स्पेनबाट पनि सैनिक फिर्ता गर्ने सम्भावना व्यक्त गरेका छन् । यसअघि रोमानियामा पनि अमेरिकी सैन्य उपस्थिति घटाइएको थियो । जुन ट्रम्पको ध्यान युरोपबाट हटाएर इन्डो–प्यासिफिक क्षेत्रमा केन्द्रित गर्ने रणनीतिको हिस्सा हो । यस निर्णयले ३२ सदस्यीय नाटो गठबन्धन कमजोर हुन सक्ने चिन्ता बढेको छ ।
ट्रम्पले पहिले जर्मनीलाई नाटोको २ प्रतिशत जीडीपी रक्षा खर्च लक्ष्य पूरा नगरेको भन्दै आलोचना गरेका थिए । तर अहिले मर्ज सरकार अन्तर्गत जर्मनीले २०२७ सम्ममा करिब १०५.८ अर्ब युरो रक्षा खर्च गर्ने योजना बनाएको छ । कुल मिलाएर जर्मनीको रक्षा खर्च जीडीपीको ३.१ प्रतिशत पुग्ने अनुमान गरिएको छ, जसमा युक्रेनलाई दिइरहेको सहयोग पनि समावेश छ ।
