: इरानबाट तेल किन्ने कम्पनीहरुमाथि अमेरिकाले लगाएको प्रतिबन्धनलाई चीनले अस्वीकार गरेको छ । चीनले इरानी तेल खरिद गर्ने पाँच कम्पनीमाथि लगाइएको अमेरिकी प्रतिबन्धलाई मान्न नसकिने स्पष्ट पारेको हो ।
चीनको वाणिज्य मन्त्रालयले विज्ञप्ति जारी गर्दै भनेको छ, ‘यी प्रतिबन्धहरूले अन्य देशहरूसँग सामान्य आर्थिक तथा व्यापारिक गतिविधि गर्न चिनियाँ कम्पनीहरूलाई रोक्छन् । यी अन्तर्राष्ट्रिय कानुन र अन्तर्राष्ट्रिय सम्बन्धका आधारभूत सिद्धान्तहरूको उल्लंघन हुन् ।’ मन्त्रालयले स्पष्ट रूपमा भनेको छ कि चीनले अमेरिकी एकतर्फी प्रतिबन्धहरूलाई मान्यता दिँदैन र चिनियाँ कम्पनी तथा संस्थाहरूले पनि यी प्रतिबन्धहरू लागू गर्नु हुँदैन ।
‘चीन सरकारले सधैं संयुक्त राष्ट्रसंघको स्वीकृति बिना र अन्तर्राष्ट्रिय कानुनमा आधारित नभएका एकतर्फी प्रतिबन्धहरूको विरोध गर्दै आएको छ’, विज्ञप्तीमा भनिएको छ । यसैबीच, हिजै मात्र अमेरिकाले अर्को चिनियाँ कम्पनीमाथि प्रतिबन्ध लगाएको थियो । अमेरिकाका अनुसार उक्त कम्पनीले ‘लाखौं ब्यारेल’ इरानी कच्चा तेल आयात गरेर ईरानका लागि अरबौँ डलरको आम्दानी जुटाएको थियो ।
तर चीनको वाणिज्य मन्त्रालयको विज्ञप्तिमा उक्त कम्पनीको नाम भने उल्लेख गरिएको छैन । अमेरिकी राष्ट्रपति डोनाल्ड ट्रम्पले यसै महिनामा चीनको भ्रमण गर्ने तयारी गरिरहेका बेला यस्तो प्रतिबन्ध लगाइएको हो । ट्ररुम्पले चिनियाँ राष्ट्रपति सी जिनपिङसँग भेट गर्ने कार्यक्रम रहेको छ ।
