: यमनले सोमालियातर्फ जाँदै गरेको आफ्नो तेल ट्याङ्कर अपहरणमा परेको जनाएको छ । यमनको कोस्ट गार्डले समुद्र किनारबाट अपहरण गरिएको एउटा तेल ट्यांकर फिर्ता ल्याउने प्रयास भइरहेको बताएको छ । अपहरण गरिएको जहाज सोमालियातर्फ लगिएको यमनले जनाएको छ ।
एम टी युरेका नामक ट्यांकर यमनको दक्षिणपूर्वी शब्वा प्रान्त नजिकबाट अपहरण गरिएको कोस्ट गार्डले जनाएको छ । सशस्त्र आक्रमणकारीहरू जहाजमा चढेर नियन्त्रणमा लिएका थिए । त्यसपछि अपहरणकारीहरूले जहाजलाई एडनको खाडी हुँदै सोमाली तटतर्फ मोडेका थिए । यो आक्रमण पछिल्ला केही हप्तामा सोमालिया नजिक भएको कम्तीमा चौंथो घटना हो । यस क्षेत्रमा समुद्री डकैतीका गतिविधि बढ्दै गएको बताइएको छ।
जसलाई इरानसँग सम्बन्धित युद्धको प्रतिक्रिया मानिएको छ । अधिकारीहरूका अनुसार रेड सागर क्षेत्रमा गस्ती गर्ने नौसैनिक शक्तिहरू होर्मुज जलसन्धिको नाकाबन्दी र व्यापारिक समुद्री मार्गहरू मोडिनुका कारण व्यस्त भएकाले समुद्री डाकुहरू अझ साहसी बनेका छन् । कोस्ट गार्डले ट्यांकर फिर्ता ल्याउन र चालक दलको सुरक्षा सुनिश्चित गर्न आफूहरू खाडी क्षेत्रका अन्तर्राष्ट्रिय साझेदार तथा सम्बन्धित निकायहरूसँग काम गरिरहेको जनाएको छ । तर चालक दलको अवस्था अझै अज्ञात छ । तर यमनको गम्भीर आर्थिक अवस्थाका कारण आफ्नो क्षमता सीमित रहेको पनि उसले चेतावनी दिएको छ ।
फेब्रुअरीमा अमेरिका र इजरायलले इरानसँग युद्ध सुरु गरेपछि सोमाली तटमा जहाज अपहरणका घटना बढेका छन् । युके मेरीटाइम ट्रेड अपरेशन्सले सोमाली तटमा समुद्री डकैतीको खतरा झन बढेको भन्दै जहाजहरूलाई सावधानीपूर्वक यात्रा गर्न चेतावनी दिएको छ । अप्रिल २१ मा सोमाली तट नजिक करिब १८ हजार ब्यारेल तेल बोकेको एउटा ट्यांकर अपहरण गरिएको थियो ।
त्यसपछिका पाँच दिनभित्र थप दुई जहाजहरू पनि कब्जा गरिएको थियो । सोमालियाको तटरेखा सन् २००० को शुरुदेखि मध्यतिर विश्वकै सबैभन्दा खराब समुद्री डकैती क्षेत्र थियो । विश्व बैंकका अनुसार यसको चरम समयमा समुद्री डकैतीले विश्व अर्थतन्त्रलाई वार्षिक करिब १८ अर्ब डलरको क्षति पुर्याएको थियो । सन् २०११ मा मात्र २०० भन्दा बढी आक्रमणहरू दर्ता भएका थिए । पछि अन्तर्राष्ट्रिय नौसैनिक गठबन्धनले यस समस्यालाई नियन्त्रणमा ल्याउँदै सन् २०१४ सम्म आक्रमणहरू लगभग शून्यमा झारेको थियो । तर २०२३ पछि फेरि घटनाहरू बढ्न थालेका छन् ।
