— अमेरिकी रक्षा मन्त्रालय, पेन्टागनले आर्टिफिसियल इन्टेलिजेन्स (एआई) को प्रयोग बढाउन गुगल, ओपनएआई र एक्सएआईसँग नयाँ सम्झौता गरेको छ । आफ्ना पछिल्ला सैन्य र अन्य रक्षा गतिविधिमा पेन्टागनले एआई प्रविधिको प्रयोग बढाएको देखिन्छ । सीएनएनमा प्रकाशित समाचारअनुसार माइक्रोसफ्ट, अमेजन वेब सर्भिसेज, एनभिडिया, ओर्याकल र रिफ्लेक्सन गरी एकसाथ ८ ठूला प्रविधि कम्पनीका विभिन्न एआई सेवा र प्रणाली खरिदको तयारी बढाएको छ ।
गत साता सार्वजनिक गरिएको विज्ञप्तिअनुसार पेन्टागनले गुगलको जेमिनाई, ओपनएआईका मोडेल र एक्सएआईको ग्रोकलाई रक्षा प्रणालीका विभिन्न नेटवर्कमा प्रयोग गर्नेछ । यी प्रविधिलाई युद्धको समय वा जटिल डेटाको वर्गीकरणका काममा प्रयोग गरिने उल्लेख छ । क्लासिफाइडसँगै अन्य सञ्जालमा पनि एआईको प्रयोग बढाउने बताइएको छ ।
रोयटर्सका अनुसार अमेरिकी सरकारको पछिल्लो एआई खरिदमा एन्थ्रोपिक भने सामेल छैन । भेनेजुएला मिसनमा क्लउड प्रयोगको शैली विवादमा आएपछि अमेरिकी सरकारले सो कम्पनीलाई कालोसूचीमा राखेको छ । तर, अमेरिकी सरकारले गएका केही महिनामा विभिन्न सैन्य गतिविधिमा एन्थ्रोपिकको क्लउड प्रयोग गरेको जनाएको थियो ।
अमेरिकी युद्ध मामिलामन्त्री पिट हेगसेथले अमेरिकी सेनाका सबै क्षेत्रमा एआईको प्रयोगलाई प्राथमिकता दिने नीति रहेको उल्लेख गरेका छन् । अमेरिकी सेनाको आधिकारिक एआई प्लाटफर्म, जेनएआईमा सरकारको आफ्नो र ठूला प्रविधि कम्पनीहरूसँग खरीद गरिएका सेवाको सफल परीक्षण भएको र झन्डै १३ लाख कर्मचारीले अहिले नै जेनएआई प्रयोग गरिरहेको मन्त्रालयको दाबी छ ।
गत अक्टोबरमा मात्रै २ अर्ब डलर लगानी जुटाएको रिफ्लेक्सन एआईमा अमेरिकी राष्ट्रपति डोनाल्ड ट्रम्पका छोरा त्यसको प्रवर्द्धनमा संलग्न रहेको रोयटर्सले उल्लेख गरेको छ । यी ८ कम्पनीबाहेक प्यालेन्टियर टेक्नोलोजीसँग पनि अमेरिकी सरकारको एआई सेवा खरिदसम्बन्धी छुट्टै सम्झौता यथावत् छ ।
अमेरिकी सरकाले एआई प्रविधि विस्तारका लागि खर्च पनि अत्याधिक बढाएको छ। रोयटर्सका अनुसार अमेरिकाले सन् २०२६ को रक्षा बजेटमा एआई र स्वचालित प्रणालीका लागि लगभग १३.४ अर्ब अमेरिकी डलर छुट्याएको छ । ठूला प्रविधि कम्पनीसँग भएका सम्झौताका लागि २० करोड अमेरिकी डलरसम्म छुट्ट्याइएको र कतिपय कम्पनीसँग एकभन्दा बढी सेवा लिने तयारी भएको सञ्चारमाध्यमहरूले उल्लेख गरेका छन् ।
चीन, रूस, इजरायल, भारत, जापान, दक्षिण कोरियालगायत देशहरूले पनि एआईलाई रक्षा प्रणालीमा तीव्र रूपमा प्रयोग गर्ने तयारी गरिरहेको विभिन्न सञ्चारमाध्यमहरूले जनाएका छन् ।
