: अमेरिकी राष्ट्रपति डोनाल्ड ट्रम्पले हर्मुज क्षेत्र पुनः सञ्चालन गर्न सुरु गरिएको अमेरिकी अभियान रोकिएको घोषणा गरेका छन्। इरानसँग सम्झौता सकरात्मक भएको भन्दै मंगलबार साँझ सार्वजनिक गरिएको वक्तव्यमा ट्रम्पले केही दिनअघि सुरु गरिएको ‘प्रोजेक्ट फ्रिडम’लाई छोटो समयका लागि रोकिने बताएका हुन्।
अन्तर्राष्ट्रिय सञ्चारमाध्यमका अनुसार अमेरिकी विदेशमन्त्री मार्को रुबियोले अमेरिका–इजरायलको संयुक्त सैन्य कारबाही ‘अपरेशन एपिक फ्युरी’ आफ्नो उद्देश्य पूरा गरेपछि समाप्त भएको बताएका छन्। ट्रम्पका अनुसार पाकिस्तानको अनुरोधमा निर्णय लिइएको हो । अमेरिका र इरानबीच मध्यस्थकर्ताको भूमिका पाकिस्तानले खेलिरहेको छ। उनले भनेका छन्, ‘नाकाबन्दी पूर्ण रूपमा यथावत् रहने भएपनि ‘प्रोजेक्ट फ्रिडम’लाई केही समयका लागि स्थगित गर्ने आपसी सहमति भएको छ, ताकि सम्झौता अन्तिम रूपमा टुंग्याएर हस्ताक्षर गर्न सकियोस्।’
यद्यपि इरानी बन्दरगाहहरूमा लगाइएको अमेरिकी नाकाबन्दी भने यथावत् रहने जनाइएको छ। अमेरिकी पक्षले शान्तिपूर्ण समाधान खोज्ने संकेत दिएको भए पनि परिस्थितिको भविष्य अन्योलपूर्ण देखिएको छ। ‘प्रोजेक्ट फ्रिडम’ को उद्देश्य क्षेत्रबाट तेल आपूर्ति पुनः सुचारु गराउनु र विश्व व्यापारलाई सामान्य अवस्थामा फर्काउनु रहेको थियो। तर स्थगन अवधिमा इरानी हस्तक्षेप जारी रहे लक्ष्य हासिल भएको दाबी गर्न कठिन हुने देखिन्छ।
अमेरिकी कदमलाई आफ्नो कूटनीतिक सफलता भएको इरानको दाबी
उता इरानी सरकारी सञ्चारमाध्यमहरूले भने अमेरिकी कदमलाई आफ्नो कूटनीतिक सफलता भएको दाबी गरेका छन्। अन्तर्राष्ट्रिय सञ्चारमाध्यमका अनुसार इरानी संसदका सभामुख मोहम्मद बकर गालिबाफले अमेरिका र उसका सहयोगीहरूले युद्धविराम उल्लंघन गरेको आरोप लगाउँदै चेतावनी दिएका छन्। ट्रम्पको घोषणा भइरहँदा खाडी क्षेत्रमा तनाव भने थप चर्किएको छ। अमेरिकी सेनाले हर्मुज क्षेत्रमा इरानी डुंगा, क्रुज मिसाइल र ड्रोनहरू नष्ट गरेको दाबी गरेको छ।
उता इरानको आइआरजीसीले नयाँ नक्सा सार्वजनिक गर्दै हर्मुज क्षेत्रमा आफ्नो नियन्त्रण विस्तार भएको दाबी गरेको छ। उसले जलमार्ग प्रयोग गर्ने जहाजहरूलाई आफूले निर्धारण गरेको मार्ग (कोरिडोर) मै चल्न चेतावनी दिँदै अन्यथा निर्णायक प्रतिक्रिया भोग्नुपर्ने जनाएको छ।
