: रूसले युक्रेनका विभिन्न शहरमा गरेको ड्रोन र मिसाइल आक्रमणबाट २६ जनाको मृत्यु भएको छ । किएभको युद्धविराम लागू हुनुअघि र मस्कोले घोषणा गरेको लडाइँ रोक्ने योजनाभन्दा तीन दिनअघि भएको आक्रमणमा परी २६ जनाको मृत्यु र ८० भन्दा बढी घाइते भएका हुन्।
मंगलबार दिउँसो, रूसी ग्लाइड बमहरूले पूर्वी शहर क्रामातोर्स्क, दक्षिणपूर्वी जापोरिज्झिया, र उत्तरी चेर्निहिभलाई प्रहार गरेका अधिकारीहरूले जनाएका छन्। जापोरिज्झियामा मात्र कम्तीमा १२ जनाको मृत्यु भएको छ र दर्जनौँ घाइते भएको प्रान्तीय गभर्नर इभान फेदोरोभले बताएका छन्।
राष्ट्रपति भोलोदिमिर जेलेन्स्कीले रूसी आक्रमणको स्थलमा उद्धार कार्य भइरहेको जानकारी दिए। रूसी हवाई बमहरूले सहरको केन्द्रमै प्रहार गर्दै सर्वसाधारणलाई लक्षित गरिएको बताउँदै उनले एकदमै निन्दनीय आतंकवादी आक्रमण भएको स्पष्ट पारे। जेलेन्स्कीले यो युद्ध अन्त्य गर्न रूस बाध्य हुनु आवश्यक भएको बताए।
युक्रेनको राज्य ऊर्जा कम्पनी नाफ्टोगाजका प्रमुख सेरही कोरेत्स्कीले भने,‘हामीले ठूलो क्षति र उत्पादन हानी बेहोरेका छौँ। यो संयुक्त आक्रमण थियो जसमा UAV (अनम्यान्ड एरियल भेहिकल) र ब्यालिस्टिक मिसाइल दुवै प्रयोग गरिएको थियो।
