: संयुक्त अरब इमिरेट्स (युएई) को रक्षा मन्त्रालयले इरानबाट भइरहेका मिसाइल र ड्रोन आक्रमणहरूको सामना गरिरहेको जनाएको छ। मन्त्रालयले अरबी भाषामा एक विज्ञप्ति जारी गर्दै याे जानकारी दिएकाे हो।
शुक्रबार बिहान सामाजिक सञ्जालमा जानकारी दिँदै मन्त्रालयले भनेको छ, 'मिसाइल र ड्रोनहरूलाई निस्तेज पार्ने सैन्य कारबाही जारी रहेकाले देशभर ठूला आवाजहरू सुनिएका छन्।'
अगाडि भनिएको छ, 'जनसाधारणलाई शान्त रहन र सम्बन्धित अधिकारीहरूले जारी गरेका सुरक्षा निर्देशनहरू पालना गर्न आग्रह गरिन्छ।'
यसअघि, अप्रिल ९ मा अमेरिका र इरानबीच युद्धविराम सुरु भएसँगै युएईले आफ्नो आकाश खतरामुक्त रहेको घोषणा गरेको थियो। तर, त्यसयता पनि युएईले निरन्तर रूपमा यस्ता आक्रमणहरूलाई बीचैमा रोक्दै आएको छ। पछिल्लो दुई महिनामा अन्य देशको तुलनामा युएईले इरानबाट सबैभन्दा बढी आक्रमणको सामना गरेको छ।
मे ३ मा अमेरिकी राष्ट्रपति डोनाल्ड ट्रम्पले अपरेशन प्रोजेक्ट फ्रिडम घोषणा गरेका थिए। जसको उद्देश्य स्ट्रेट अफ हर्मोजमा जहाजहरूको आवागमनलाई सुरक्षित बनाउनु थियो। इरानले यसलाई आफ्नो सार्वभौमसत्तामाथिको हस्तक्षेप मानेको छ र युएई जस्ता अमेरिकी सहयोगी राष्ट्रहरूलाई निशाना बनाइरहेको छ।
यसैबीच इरानले युएईलाई अन्य खाडी मुलुकहरूबाट अलग्याउन र अमेरिकी सैन्य उपस्थितिलाई कमजोर बनाउन पटक पटक आक्रमण गरिरहेको अन्तराष्ट्रिय सञ्चारमाध्यमहरुमा उल्लेख छ ।
यसै हप्ताको सुरुमा ( मे ४ )फुजैराहको तेल भण्डारण क्षेत्रमा भएको ड्रोन आक्रमणले ठूलो आगलागी गराएको थियो। इरानले युएईको आर्थिक स्रोत र ऊर्जा केन्द्रहरूलाई कमजोर पार्न खोजेको देखिन्छ।
