: अमेरिका र इरानको बढ्दो तनावकाबीच अमेरिकी राष्ट्रपति डोनाल्ड ट्रम्पलाई ठूलो कानुनी झड्का पनि लागेको छ। ट्रम्पले विश्वभरका सामग्रीहरूमा लगाएको १० प्रतिशतको अतिरिक्त आयात शुल्क (कर)लाई अमेरिकी संघीय अदालतले अवैध ठहर गर्दै खारेज गरिदिएको छ।
अमेरिकी इन्टरनेशनल ट्रेड कोर्टले ट्रम्पद्वारा गत फेब्रुअरी २४, २०२६ मा लगाइएको १० प्रतिशतको विश्वव्यापी आयात शुल्कलाई कानुनी रूपमा अनुचित ठहर गरेको हो।
अदालतले आफ्नो फैसलामा भनेको छ कि ट्रम्पले सन् १९७४ को व्यापार ऐनको धारा १२२ को गलत प्रयोग गरेका छन्। यसअघि अमेरिकी सर्वोच्च अदालतले ट्रम्पको व्यापक शुल्क नीतिलाई खारेज गरेपछि उनले यो नयाँ १० प्रतिशत शुल्क लगाएका थिए।
अन्तर्राष्ट्रिय व्यापार अदालतले २–१ को बहुमतले यो शुल्कलाई रद्द गर्ने फैसला सुनाएको छ। २४ वटा अमेरिकी राज्य र धेरै साना व्यवसायीहरूले यो शुल्क विरुद्ध मुद्दा दायर गरेका थिए। उनीहरूको ट्रम्पले सर्वोच्च अदालतको अघिल्लो आदेशलाई छल्नका लागि यो कदम चालेको दाबी गरेका थिए ।
ट्रम्पले भुक्तानी सन्तुलन मिलाउन यो शुल्क लगाएको दाबी गरे पनि अदालतले उक्त कानुन यस्तो अवस्थामा प्रयोग गर्न नमिल्ने ठहर गरेको छ।
यो फैसलासँगै अब अमेरिकी न्याय विभागले यसविरुद्ध पुनरावेदन गर्ने तयारी गरिरहेको छ। तर तत्कालका लागि ट्रम्पको यो ट्यारिफ योजनामा पूर्णविराम लागेको छ, जसले विश्व बजार र अमेरिकी उपभोक्ताहरूलाई केही राहत मिल्ने अपेक्षा गरिएको छ।
