: युद्धविरामका कारण केही सातादेखि अमेरिका र इरानबीच मत्थर रहेको मध्यपूर्वको द्वन्द्व फेरि चर्किन थालेको छ । जलमार्ग होर्मुज स्ट्रेटमा अमेरिका र इरानबीच गोलाबारी भएको घटना सार्वजनिक भए लगत्तै शुक्रबार बिहान यूएईले इरानबाट हवाई हमला गरिएको बताएको छ ।
यूएईको रक्षा मन्त्रालयले इरानबाट प्रहार गरिएका क्षेप्यास्त्र र ड्रोन रोकिएको बताएको छ । यूएईको रक्षा मन्त्रालयले फेरि एक पटक इरानले आफूमाथि हमला गरेको दाबी गरेको छ । यूएईको रक्षा मन्त्रालयका अनुसार, उसका एयर डिफेन्स सिस्टमहरूले इरानबाट आएका मिसाइल र ड्रोन आक्रमणलाई रोकिरहेका छन् ।
रक्षा मन्त्रालयले एक्स पोस्टमार्फत जानकारी दिँदै भनेको छ, ‘यूएईको एयर डिफेन्स सिस्टमले ब्यालिस्टिक मिसाइल, क्रुज मिसाइल र ड्रोनहरूलाई अवरोध गरिरहेको छ, जसका कारण देशका विभिन्न भागहरूमा ठूलो आवाज सुनिएको छ ।’ मन्त्रालयले सर्वसाधारणलाई शान्त रहन र सुरक्षा निकायहरूले जारी गरेका निर्देशनहरूको पालना गर्न अपिल गरेको छ ।
रक्षा मन्त्रालयले नागरिकहरूलाई चेतावनी दिँदै भनेको छ, ‘खसेका टुक्रा वा भग्नावशेष नजिक नजानुहोस्, तिनलाई नछुनुहोस् र तिनका तस्वीर नखिच्नुहोस् । सफल एयर इन्टरसेप्शनपछि खसेका वस्तुहरूको जाँच सम्बन्धित अधिकारीहरूले गर्नेछन् ।’ यसअघि पनि यूएईको रक्षा मन्त्रालयले ४ मेमा इरानले आफू माथि धेरै मिसाइल प्रहार गरेको दाबी गरेको थियो, जसलाई उसको डिफेन्स सिस्टमले निष्क्रिय बनाएको थियो । उक्त घटनामा तीन जना भारतीय नागरिक घाइते भएका थिए ।
