: काभा महिला च्याम्पियनसिप–२०२६ को ट्रफी सार्वजनिक गरिएको छ । नेपाल भलिबल संघले आइतबार एक कार्यक्रम गर्दै ट्रफी सार्वजनिक गरेको हो ।
जेठ ८ बाट १५ गतेसम्म हुने यस प्रतियोगिताका ८ वटा राष्ट्रहरुले प्रतिस्पर्धा गर्नेछन् । यस प्रतियोगितामा नेपाल समूह ‘ए’ मा रहेर प्रतिस्पर्धा गर्नेछ । नेपालसँगै समूह ‘ए’ मा कीर्गिस्तान, भारत र माल्दिभ्स रहेका छन् । समूह ‘बी’ मा इरान, काजकिस्तान, श्रीलंका र बंगलादेश रहेका छन् । प्रतियोगिता राष्ट्रिय खेलकुद परिषद् (राखेप) को कर्भड हलमा हुनेछ ।
यो प्रतियोगिता एफआइभीबीको र्याकिङ प्रतियोगिता हो । यो प्रतियोगिताको जित र हारले नेपालको अन्तर्राष्ट्रिय वरियतामा फरक पार्नेछ । यस पटकको प्रतियोगितामा अधिकतम ९०० देखि १ हजार मात्रै टिकट बिक्री गरिने नेपाल भलिबल संघले जानकारी दिएको छ । टिकटको मूल्य भने खेलअनुसार १०० देखि एक हजार रुपैंयाँसम्म हुनेछ । यस पटकको आधिकारिक टिकट बिक्रेता नेपाल भलिबल संघ आफैं रहनेछ ।
जारी प्रतियोगिताका लागि नेपालले १ महिना लामो तयारी गरेको छ । २० जना र अन्तिम १६ गर्दै नेपाली महिला टोलीले प्रतियोगिताको लागि तयारी गरेको हो । नेपाली महिला टोलीका प्रमुख प्रशिक्षक जगदिश भट्टले यस पटक पहिला भन्दा राम्रो तयारी रहेको बताए । ‘विगतका दिनहरुमा भन्दा राम्रो प्रदर्शन गर्नेछौं’, उनले ट्रफी सार्वजनिक कार्यक्रममा बोल्दै भने । यो प्रतियोगिताले वरियतामा फरक पार्ने भएकाले नेपालको लागि यो प्रतियोगिता निकै महत्वपूर्ण रहेको उनले बताए । ‘यसपालिको नतिजाले वरियतामा असर पार्नेछ ।’ नेपाली महिला टोलीले समूह चरणको पहिलो खेल भारतसँग खेल्ने छ ।
