: अर्थमन्त्री डा. स्वर्णिम वाग्लेले अहिले बजेट तयारीको काम भइरहेका बेला सांसदहरुको अनौपचारिक रुपमा भेटघाट बाक्लो भइरहेको बताएका छन् । संघीय संसद अन्तर्गतको आज बसेको अर्थ समितिको वैठकमा बोल्दै अर्थमन्त्री वाग्लेले अहिले बजेट तयारीको काम भइरहेको हुँदा पनि धेरै सांसदहरुले नीतिगतभन्दा पनि बजेटकै विषयलाई लिएर आइरहेको बताएका छन् ।
उनले सांसदहरुले बजेटको विषयलाई चासो दिएर अनौपचारिक रुपमा व्यक्तिगत र समूहगत रुपमा समेत भेटघाट गरिरहेको जानकारी दिएका छन् । अर्थमन्त्री वाग्लेले अधिकांश सांसदहरु नीतिगत भन्दा पनि केहि साना–साना बजेटकै कुरा लिएर आउने गरेको बताउँदै यो विगतकै अभ्यास समेत भएको बताए । अर्थमन्त्री वाग्लेले यस पटक बजेटमा सिधै अर्थ मन्त्रालय प्रवेश नगर्ने र जुन मन्त्रालय अन्तर्गतको योजना हो त्यहि मन्त्रालय अन्तर्गत आउनु पर्छ भन्ने सिद्धान्तको आधारमा अगाडि बढिरहेको समेत जानकारी गराए ।
उनले सम्बन्धित मन्त्रालयमा ‘इन्ट्री’ भएर आउने र असाध्यै जायज, १६ आवधिक योजना र सरकारले नै बोलेका कुरा र वाचा र सांसदले आफ्ना निर्वाचन क्षेत्रमा गरेका वाचाका विषयमा अर्थमन्त्रालय उद्धार भए पनि त्यो चरणमा अर्थ मन्त्रालय पुगिनसकेको अर्थमन्त्री वाग्लेले बताए । अहिले पनि सांसदहरुका योजनाहरुलाई अधिकतम रुपमा बजेटमा समावेश गर्न अर्थ मन्त्रालयले काम गरिरहेको समेत बताएका छन् ।
