— चन्द्रौटास्थित आधारभूत स्वास्थ्य सेवा अस्पतालमा ३८ लाख बढी रकम हिनामिना भएको तथ्य बाहिरिएको करिब एक महिनापछि प्रहरीले अनुसन्धान तीव्र बनाएको छ । शिवराज नगरपालिकाले चन्द्रौटामा संचालन गरिरहेको अस्पतालको रकम हिनामिनामा संलग्न रहेको आरोपमा मंगलबार पाँच जनालाई पक्राउ गरेको हो ।
गत आव ०८१/८२ को लेखापरीक्षणका क्रममा अस्पतालको नेपाल बैंक लिमिटेड चन्द्रौटा शाखामा रहेको खातामा जम्मा हुनुपर्ने ३८ लाख १९ हजार ७ सय ७० रुपैयाँ नदेखिएपछि रकम हिनामिना भएको कुरा बाहिर आएको हो । तर, उक्त रकम जम्मा गरेको भनेर देखाइएको १ सय २९ वटा भौचर भेटिए पनि बैंक स्टेटमेन्टमा रकम जम्मा भएको नदेखिएपछि उक्त रकम असुलउपर गर्नुपर्ने राय लेखेको लेखा परीक्षक लक्ष्मण निरौलाले बताए ।
रकम हिनामिना भएको घटना बाहिरिएपछि वैशाख ४ गते शिवराज नगरपालिकाका प्रमुख अजय थापाले वडा प्रहरी कार्यालय, चन्द्रौटालाई पत्राचार गरेका थिए । आर्थिक रकम हिनामिना र किर्ते भौचर सम्बन्धमा अनुसन्धान गरी पाउँ भनेर दोषी देखिएका पक्षलाई कडा कानुनी प्रक्रिया अघि बढाइदिन भन्दै निवेदन दिएका थिए । तर, निवेदन कारबाहीभन्दा पनि जानकारी र सूचनामूलक भएकाले प्रहरीले खासै चासो दिएन । महिनादिन हुन लाग्दा पनि कारबाही प्रक्रिया अघि नबढेपछि स्थानीय स्तरमा नगरपालिकाविरुद्ध टीका–टिप्पणी र आलोचना बढिरहेको थियो ।
यसपछि नगरपालिकाले सक्रियता देखाउँदै रकम हिनामिनाबारे खोज अनुसन्धान गरी दोषीलाई कारबाही गर्न आइतबार शिवराज नगरपालिकाको कार्यपालिका बैठक बसेर किटानी जाहेर दिने निर्णय गरेको थियो । यसपछि अस्पताल व्यवस्थापन समिति अध्यक्ष तथा वडा नं ५ का वडाध्यक्ष नेत्र बेल्बासेले सोमबार वडा प्रहरी कार्यालय, चन्द्रौटामा चार जना अस्पतालका कर्मचारी मेडिकल सुपरिटेन्डेन्ट डा. अमित पाण्डे, तत्कालीन प्रशासन प्रमुख वीरेन्द्र मिश्र र फार्मेसिस्टद्वय लक्ष्मण रिजाल र रुक्साना खातुनविरुद्ध किटानी जाहेरी दिए । जाहेरी दर्ता हुनासाथ प्रहरीले महाराजगन्ज नगरपालिका–१, घर भई अस्पतालका मेडिकल सुपरिटेन्डेन्ट डा. पाण्डे र शिवराज नगरपालिका–५, घर भएकी अस्पतालकी फार्मेसिस्ट खातुनलाई पक्राउ गरेको जिल्ला प्रहरी प्रवक्ता डीएसपी रिपेन्द्रकुमार सिंहले बताए ।
पक्राउ परेकाबाट नयाँ तथ्य आएकाले फेरि अस्पताल अध्यक्ष बेल्बासेबाट थप केही व्यक्तिको नाम राखेर पुरक जाहेरी लिएर प्रहरीले अनुसन्धान अघि बढाएको छ । पुरक जाहेरीका आधारमा थप तीन जना पक्राउ परेका हुन् । पक्राउ पर्नेमा दाङ तुल्सीपुर उपमहानगरपालिका–५, नामीनगर घर भएका शिवराज नगरपालिकाका स्वास्थ्य शाखा प्रमुख चूडामणी भट्टराई, गुल्मी सत्यवती गाउँपालिका–५, घर भएका नेपाल बैंक लिमिटेड चन्द्रौटा शाखाका क्यासियर कमलप्रसाद भण्डारी र शिवराज नगरपालिका–३, मदवा घर भई बैंककै चन्द्रौटा शाखामा कार्यरत रहेर अहिले रूपन्देहीको मणिग्राम शाखामा सरुवा भएका कार्यालय सहयोगी विक्रम केसीलाई पक्राउ गरी अनुसन्धानको दायरामा ल्याइएको छ । पाँच जनालाई अदालतबाट ७ दिनको म्याद लिएर अनुसन्धान थालिएको छ । किटानी जाहेरी परेका तत्कालीन प्रशासन प्रमुख वीरेन्द्र मिश्र (हाल शिवगढी स्वास्थ्य चौकी इन्चार्ज) र फार्मेसिस्ट लक्ष्मण रिजाल भने फरार छन् ।
यो घटनाका दुई पाटा छन् । एउटा अस्पतालका कर्मचारी र अर्को बैंकका कर्मचारी ह्न् ु। तर, बैंकको प्रधान कार्यालयले गरेको छानबिनमा बैंक कर्मचारीको त्रुटि र कमजोरी नदेखिएको प्रतिवेदन दिएपछि अस्पतालका कर्मचारी छानबिनमा तानिएको जिल्ला प्रहरी प्रमुख उपरिक्षक सन्तोष आचार्यले बताए । ‘अहिलेको अनुसन्धानले छानबिन निष्कर्षमा पुग्छ,’ उनले भने, ‘प्रारम्भिक छानबिन निकै सकारात्मक छ ।’
अस्पतालमा कार्यरत विभिन्न व्यक्तिको नाम उल्लेख गरी नेपाल बैंक लिमिटेड चन्द्रौटा शाखामा एक वर्षभित्र १ सय २९ वटा भौचरमार्फत रकम जम्मा गरेको भौचरको अभिलेख छ । तर, बैंकमा जम्मा गरिएको भौचरमा बैंकमा रकम बुझ्ने कर्मचारीको नक्कली हस्ताक्षर र नक्कली छाप लगाइएको बैंकले जनाएको छ । भौचरमा अनावश्यक रुजु गरेको चिह्न लगाइएको र पैसा जम्मा गर्न जाने एक जना र भौचरमा अर्काको नाम लेख्ने गरेको पाइएको छ । भौचरमा लागेको रबर छाप र बैंकले प्रयोग गर्ने रबर छाप फरक छन् । यसले पनि अनियमितताको आशंका थपेको छ ।
घटनाको वास्तविकता बाहिर आउन ढिलो हुँदा नगरपालिकाप्रति धेरै प्रश्न तेर्सिएकाले दोषीलाई कारबाही होस् भनेर किटानी जाहेरी दिएको शिवराज नगरपालिकाका प्रमुख अजय थापाले बताए । अब प्रहरीले निष्पक्ष रूपमा छानबिन गरेर दोषीलाई कडा कारबाही गर्नेमा आफू विश्वस्त रहेको उनले बताए । घटना सार्वजनिक भएको लामो समयसम्म पनि ठोस कारबाही फ्रक्रिया अघि नबढ्दा स्थानीय स्तरमा आक्रोश र असन्तोष बढ्दै गएको थियो ।
नेत्रत्रिवम चन्द नेतृत्वको नेपाल कम्युनिस्ट पार्टी (नेकपा) जिल्ला समितिले अस्पतालको रकम अनियमितता गर्नेविरुद्ध कारबाहीको माग गर्दै सोमबार शिवराज नगरपालिका घेराउ गरेको थियो । त्यस्तै राष्ट्रिय जनमोर्चा शिवराज नगर कमिटीले रकम हिनामिना गर्नेविरुद्ध कडा कारबाहीको माग गर्दै सोमबार नगरपालिकामा ज्ञापनपत्र बुझाएको छ ।
