: अमेरिकी राष्ट्रपति डोनाल्ड ट्रम्प र चिनियाँ राष्ट्रपति सि जिनपिङबीचको उच्चस्तरीय भेटवार्तामा व्यापार सम्झौता हुन सकेको छैन। ठूलो व्यापारिक प्रतिनिधिमण्डलसहित चीन भ्रमणमा रहेका ट्रम्प र चिनियाँ पक्षबीच व्यापारिक तनाव कम गर्ने विषयमा छलफल भए पनि ठोस सहमति भने हुन सकेन् ।
गत वर्ष अक्टोबरमा दुई देशबीच व्यापार युद्ध (ट्रेड वार) रोक्न प्रारम्भिक सहमति भएको थियो। सोही सहमति अनुसार अमेरिकाले चिनियाँ सामानमा लगाउने भनिएको भारी भन्सार शुल्क (ट्यारिफ) रोकेको थियो भने चीनले 'रेयर अर्थ' धातुको निर्यातमा गरेको कडाइ खुकुलो पारेको थियो।
ह्वाइट हाउसका अनुसार दुवै नेताले व्यापारिक सम्बन्धलाई व्यवस्थित गर्न र बारम्बार ट्यारिफबारे छलफल गरिरहनु पर्ने झन्झट अन्त्य गर्न एउटा ‘बोर्ड अफ ट्रेड’ बनाउने सहमति गरेका छन्। यद्यपि, अमेरिकी अधिकारीहरूले यो संयन्त्रलाई पूर्ण रूपमा कार्यान्वयनमा ल्याउन अझै धेरै काम बाँकी रहेको बताएका छन्।
अमेरिकी अर्थमन्त्री स्कट बेसेन्टले यस भ्रमणका क्रममा बोइङको ठूलो अर्डर तथा अमेरिकी ऊर्जा र कृषि उत्पादन खरिदबारे चीनबाट महत्त्वपूर्ण घोषणाहरू हुन सक्ने संकेत दिएका छन्।
बुधबारबाट सुरु भएको ट्रम्पको यस भ्रमणमा अमेरिकी कर्पोरेट क्षेत्रका दिग्गजहरूको उपस्थितिले विशेष चर्चा पाएको छ। ट्रम्पले दर्जनौँ शीर्ष व्यवसायीहरूलाई साथमा ल्याएका छन्, जसमा टेस्लाका सीईओ एलन मस्क र एनभिडियाका सीईओ जेन्सेन हुआङ समावेश छन्।
यी दुवै कम्पनी अमेरिका–चीन आर्थिक सम्बन्धका सबैभन्दा संवेदनशील कडी मानिन्छन्। टेस्लाको सांघाई प्लान्ट र चिनियाँ बजारमा ठूलो निर्भरता छ। अर्कोतर्फ, एनभिडियाका माइक्रोचिप्स विश्वव्यापी एआई प्रतिस्पर्धाको केन्द्रमा छन्। जेन्सेन हुआङको उपस्थितिलाई निकै अर्थपूर्ण मानिएको छ, किनकि उनको नाम सुरुवाती सूचीमा थिएन। यसले एआई र सेमिकन्डक्टर चिप्समा चीनको पहुँचबारे गम्भीर छलफल भइरहेको संकेत गर्दछ।
भ्रमण टोलीमा सहभागी प्रमुख कार्यकारीहरू ह्वाइट हाउसले सार्वजनिक गरेको सूचीमा विश्वप्रसिद्ध कम्पनीका प्रमुखहरूको नाम समावेश छ ।
शुक्रबार भ्रमणको दोस्रो दिन पनि दुई नेताबीच अन्य विविध मुद्दामा वार्ता हुने अपेक्षा गरिएको छ। अमेरिकाले चीनमाथि उच्च प्रविधिको निर्यातमा पहिले नै कडा नियन्त्रण लगाएका कारण यो वार्ताको नतिजालाई विश्वभर चासोका साथ हेरिएको छ।
