: अदालतबाट दोषी ठहर भई फरार रहेका दुई जना प्रतिवादीलाई प्रहरीले पक्राउ गरेको छ । इलाका प्रहरी कार्यालय धरानका अनुसार विभिन्न मुद्दामा अदालतबाट कैद तथा जरिवाना सजाय सुनाइएपछि फरार रहेका उनीहरूलाई वडा प्रहरी कार्यालय धरानबाट खटिएको प्रहरी टोलीले पक्राउ गरेको हो ।
ईलाका प्रहरी कार्यालय धरानका डीएसपी भीषणबाबु राईले सुनसरी जिल्ला अदालतको मुद्दा दर्ता नं. ०७५–ऋ १–०६०२ अन्तर्गत जबरजस्ती करणी मुद्दामा दोषी ठहर भएका धरान उपमहानगरपालिका–१७ निवासी ३७ वर्षीय प्रकाश दमाइलाई पक्राउ गरिएको बताए । अदालतको २०७९ पुस ५ गतेको फैसलाले उनलाई १० वर्ष कैद, २ लाख रुपैयाँ जरिवाना, १ लाख रुपैयाँ पीडितलाई क्षतिपूर्ति तथा १२ हजार रुपैयाँ पीडित राहत कोषमा बुझाउनु पर्ने फैसला गरेको थियो ।
प्रकाश दमाइ गत भदौको जेनजी आन्दोलनका क्रममा कारागार कार्यालय झुम्का सुनसरीबाट फरार भएका थिए । उनलाई धरान–१७ स्थित पटनाली क्षेत्रबाट पक्राउ गरिएको डीएसपी राईले बताए । ज्यान मार्ने मुद्दामा फरार रहेका धरान–१५ निवासी २९ वर्षीय दाँते भन्ने गणेश राईलाई पनि प्रहरीले पक्राउ गरेको छ ।
सुनसरी जिल्ला अदालतको २०७८ पुस २३ गतेको फैसलाले उनलाई ६ महिना कैद तथा ५ हजार रुपैयाँ जरिवाना सजाय सुनाएको थियो । वडा प्रहरी कार्यालय धरानबाट खटिएको टोलीले गणेश राईलाई उनकै घरबाट पक्राउ गरेको छ । पक्राउ परेका दुवै जनालाई आवश्यक कारबाहीका लागि जिल्ला अदालत सुनसरीमा बुझाइने डीएसपी राईले बताएका छन् ।
