: अमेरिकी राष्ट्रपति डोनाल्ड ट्रम्पले खाडी राष्ट्रहरूको अनुरोधमा इरानमाथिको सैन्य आक्रमण स्थगित गरेको बताएका छन्। गम्भीर वार्ताहरू भइरहेको उल्लखे गर्दै उनले सम्झौता हुन सक्ने बताएका हुन्।
इरानले वासिङ्टनलाई शान्ति प्रस्ताव पठाएपछि मंगलबारका लागि तय गरिएको सैन्य आक्रमण स्थगित गरेको र अहिले भइरहेको गम्भीर वार्ताका बीच इरानको आणविक कार्यक्रमलाई सीमित गर्ने सम्झौतामा पुग्ने धेरै राम्रो मौका रहेको डोनाल्ड ट्रम्पले बताए ।
ट्रुथ सोसलमा लेखेको पोस्टमा उनले कतार, साउदी अरेबिया र संयुक्त अरब इमिरेट्सका नेताहरूले आफूलाई त्यसो गर्न आग्रह गरेको बताए।
इरानका लागि कुनै पनि आणविक हतियार नहुने उनको भनाई छ। तर उनले स्वीकार्य सम्झौता नभएमा अमेरिका एक क्षणको सूचनामा इरानमाथि पूर्ण, ठूलो मात्रामा आक्रमण गर्न तयार हुने चेतावनी दिए।
यता ट्रम्पको घोषणापछि पनि इरानले राज्य सञ्चालित सञ्चारमाध्यममा जारी विज्ञप्तिमा आफ्नो अडान कायम राखेको छ। इरानमाथि आक्रमण गर्दा अमेरिका र उसका सहयोगीहरूलाई थप रणनीतिक गल्ती वा गलत गणना नगर्न चेतावनी दिइएको छ। इरानी सशस्त्र सेना "विगतको भन्दा बढी तयार र बलियो" रहेको बताएको छ। इरानको शीर्ष सुरक्षा निकायले होर्मुजको जलडमरू व्यवस्थापन गर्न नयाँ निकाय गठनको घोषणा गरेको छ र जहाजहरूबाट पार गर्न शुल्क लिन चाहन्छ।
डोनाल्ड ट्रम्पले इरानमाथि आक्रमण नगर्ने घोषणा गर्नुअघि , टर्कीका विदेशमन्त्रीले अमेरिका र इरानबीचको वार्ताको तत्कालको चिन्ता होर्मुजको जलडमरू खुला राख्नु रहेको बताएका थिए।
अमेरिकाले इरान युद्धबाट प्रभावित ऊर्जा-जोखिममा परेका देशहरूलाई सहयोग गर्न रूसी समुद्री तेल खरिद गर्न अनुमति दिने प्रतिबन्ध छूटको थप ३० दिनको विस्तारको घोषणा गरेको छ ।
