: इजरायलले गरेको हवाई आक्रमणमा परी दक्षिणी लेबनानमा कम्तीमा १९ जनाको मृत्यु भएको छ। लेबनानको स्वास्थ्य मन्त्रालयका अनुसार, एकै स्थानमा भएको भयानक आक्रमणमा परि १० जनाले ज्यान गुमाएका छन्।
दक्षिणी लेबनानको देइर कनौन कसबानजिकै रहेको एक आवासीय घरलाई निशाना बनाएर सो आक्रमण गरिएको थियो। मृत्यु हुनेहरूमा तीन बालबालिका र तीन महिला समेत रहेका छन्।
इरान समर्थित सिया इस्लामिक सङ्गठन हिजबुल्लाहले इजरायलमाथि रकेट प्रहार गरेपछि लेबनान गत मार्च २ देखि यस युद्धमा प्रत्यक्ष रूपमा सामेल भएको थियो। अमेरिका र इजरायलको संयुक्त सैन्य कारबाहीमा इरानका सर्वोच्च नेताको मृत्यु भएपछि हिजबुल्लाहले त्यसको बदलास्वरूप इजरायलमाथि आक्रमण सुरु गरेको थियो।
अमेरिकाले लेबनान र इजरायलबीच ४५ दिनका लागि युद्धविराम थप गर्ने सहमति भएको घोषणा गरेको एक हप्ता पनि नबित्दै यो पछिल्लो घातक आक्रमण भएको हो। दुवै पक्षबीच आगामी जुन महिनाको सुरुवातमा पुनः शान्ति वार्ता सुरु हुने कार्यतालिका रहेको छ।
युद्धविरामको अवधि थपिए तापनि इजरायल र हिजबुल्लाहबीच विशेषगरी दक्षिणी लेबनानमा निरन्तर गोलाबारी जारी छ। इजरायलले आफ्ना आक्रमणहरू हिजबुल्लाहका ठेगानाहरू केन्द्रित रहेको दाबी गरे पनि स्थलगत रूपमा भने महिला र बालबालिकासहित सर्वसाधारण नागरिकहरू ठुलो सङ्ख्यामा मारिइरहेका छन्।
