— ब्रिटेनस्थित समुद्री व्यापार क्षेत्रको प्रतिष्ठित प्रकाशन लयड्स लिस्ट का अनुसार हर्मुज जलमार्गबाट जहाजहरूको आवत–जावत गत हप्ता उल्लेखनीय रूपमा वृद्धि भएको छ । इरानसँग सम्बन्धित व्यापार गतिविधि बढेसँगै यो वृद्धि देखिएको हो, यद्यपि संयुक्त राज्य अमेरिकाले लगाएको प्रतिबन्धहरू अझै कायम छन् ।
प्रतिवेदनका अनुसार मे ११ देखि मे १७ सम्मको एक हप्ताको अवधिमा कम्तीमा ५४ वटा जहाजहरूले हर्मुज जलमार्ग पार गरेका छन् । यो संख्या अघिल्लो हप्ताको २५ जहाजको तुलनामा झन्डै दोब्बरभन्दा बढी हो, जसले समुद्री व्यापारमा तीव्र गतिशीलता देखाएको छ ।
यो वृद्धि मुख्यतः इरानसँग जोडिएका व्यापारिक गतिविधिहरूमा आएको उछालका कारण भएको बताइएको छ। विशेषगरी तेल, ग्यास तथा अन्य मालसामान ढुवानीसँग सम्बन्धित गतिविधिहरू बढेको उल्लेख छ ।
लन्डनमा आधारित समुद्री विश्लेषण कम्पनी विन्डवार्ड का तथ्यांक अनुसार सोमबार मात्र १९ वटा जहाजहरूले उक्त जलसन्धि पार गरेका थिए । तीमध्ये ९ वटा जहाज भित्रिँदै गरेका र १० वटा बाहिरिँदै गरेका थिए ।
भित्रिने जहाजहरू मुख्यतः भारत र श्रीलङ्कालगायत देशका झण्डा बोकेका कार्गो जहाजहरू थिए । बाहिरिने जहाजहरूमा एक तेल ट्यांकर र नौ वटा कार्गो जहाजहरू समावेश थिए, जसमा पाँच वटा जहाज इरानको झण्डा बोकेका थिए ।
त्यस्तै इरानको इस्लामिक रिभोलुसनरी गार्ड्स (आईआरजीसी)ले पछिल्लो २४ घण्टामा हर्मुज मार्गबाट २६ वटा जहाजहरू पार गरेको बताएकाे छ।
