: चिनियाँ राष्ट्रपति सी जिनपिङ र रुसी राष्ट्रपति भ्लादिमिर पुटिनबीच भएको उच्चस्तरीय वार्तापछि दुवै देशले एक संयुक्त विज्ञप्ति (जइन्ट स्टेटमेन्ट) जारी गरेका छन्।
सामाजिक सञ्जाल प्लेटफर्म टेलिग्राममार्फत सार्वजनिक गरिएको उक्त विज्ञप्ति अनुसार, रुस र चीनले एक समानता र सन्तुलनमा आधारित बहुध्रुवीय (मल्टीपोलर) विश्व तथा नयाँ स्वरूपको अन्तर्राष्ट्रिय सम्बन्धलाई प्रवर्द्धन गर्ने प्रतिबद्धता जनाएका छन्। दुवै देशले वर्तमान विश्वमा अझ बढी न्यायसंगत र उत्कृष्ट वैश्विक व्यवस्थाको निर्माण हुनुपर्नेमा जोड दिएका छन्।
यसका लागि चीन र रुसले अन्तर्राष्ट्रिय समुदायसमक्ष केही आधारभूत सिद्धान्तहरू अपनाउन अपील समेत गरेका छन् ।
विश्वका सबै देशहरूले मिलेर काम गर्ने र त्यसबाट सबैलाई फाइदा पुग्ने वातावरणको निर्माण।
प्रत्येक राष्ट्रको सुरक्षा र सार्वभौमसत्तालाई बराबर महत्त्व दिइने व्यवस्था।
विश्वका महत्त्वपूर्ण निर्णयहरूमा धेरै भन्दा धेरै देशहरूको सहभागिता सुनिश्चित गरी प्रणालीलाई सुदृढ बनाउने।
संसारका विभिन्न संस्कृति, सभ्यता र विचारधाराको सम्मान गरिने ।
रुस र चीनले बहुध्रुवीय विश्व र अझ बढी न्यायपूर्ण अन्तर्राष्ट्रिय सम्बन्धका लागि आगामी दिनमा पनि निरन्तर मिलेर कार्य गर्ने साझा संकल्प दोहोर्याएका छन्। यस शिखर सम्मेलन (समिट) का क्रममा चीन र रुसबीच व्यापार, अर्थतन्त्र र प्रविधिसँग सम्बन्धित २० भन्दा बढी महत्त्वपूर्ण सम्झौताहरूमा हस्ताक्षर भएको छ।
वार्ताका क्रममा चिनियाँ राष्ट्रपति सी जिनपिङले चीन र रुसले 'अझ बढी न्यायपूर्ण र तर्कसंगत वैश्विक शासन प्रणाली' लाई प्रवर्द्धन गर्नमा आफ्नो ध्यान केन्द्रित गर्नुपर्ने बताए। यता रुसी राष्ट्रपति भ्लादिमिर पुटिनले दुई देशबीचको सम्बन्ध वर्तमान समयमा 'वास्तवमै अभूतपूर्व र ऐतिहासिक उचाइमा' पुगेको उल्लेख गरे।
