: नक्कली शैक्षिक प्रमाणपत्र पेश गरी शिक्षक पदमा नियुक्ति लिएको आरोपमा जुम्लाका एक शिक्षकविरुद्ध भ्रष्टाचार मुद्दा दायर गरिएको छ।
अख्तियार दुरुपयोग अनुसन्धान आयोगले जुम्लाको पातारासी गाउँपालिका–१ स्थित गंगा माध्यमिक विद्यालय, पेरे माथाचौरमा कार्यरत शिक्षक भोजराज न्यौपानेविरुद्ध आज विशेष अदालत काठमाडौंमा आरोपपत्र दायर गरेको हो।
आयोगका अनुसार न्यौपानेले माध्यमिक विद्यालय गणित (राहत) शिक्षक पदमा नियुक्ति लिन त्रिभुवन विश्वविद्यालयबाट जारी भएको भनिएको प्रविणता प्रमाणपत्र तह र स्नातक तहका नक्कली शैक्षिक प्रमाणपत्र पेश गरेको पाइएको छ।
आयोगका अनुसार उनीविरुद्ध शैक्षिक योग्यताको नक्कली प्रमाणपत्र सम्बन्धी उजुरी परेको थियो। उजुरीमाथिको अनुसन्धानका क्रममा उनले झुट्टा शैक्षिक योग्यताको प्रमाणपत्रका आधारमा शिक्षक पदमा नियुक्ति लिइ लाभ तथा सुविधा लिएको पुष्टि हुन आएको आयोगले जनाएको छ।
उनीविरुद्ध भ्रष्टाचार निवारण ऐन, २०५९ को दफा १६ उपदफा (१) अनुसार कसुर कायम गरी सोही ऐनबमोजिम सजायको मागदाबी गर्दै मुद्दा दायर गरिएको आयोगले जनाएको छ।
