: अमेरिकाले पूर्वी तथा मध्य अफ्रिकामा फैलिएको इबोला प्रकोपलाई मध्यनजर गर्दै कङ्गो, युगान्डा र दक्षिण सुडानबाट आउने यात्रुमाथि प्रवेशमा कडाइ गरेको छ।
अमेरिकी रोग नियन्त्रण तथा रोकथाम केन्द्र (सीडीसी)ले कानुनी स्थायी बसोबास अनुमति (ग्रीन कार्ड) प्राप्त व्यक्तिहरूसहित ती देशमा पछिल्लो २१ दिनभित्र बसेका व्यक्तिलाई अस्थायी रूपमा अमेरिका प्रवेशमा रोक लगाइने जनाएको हो।
सीडीसीका अनुसार नयाँ व्यवस्था अमेरिकी स्वास्थ्य तथा मानव सेवा विभागले जारी गरेको अन्तरिम सार्वजनिक स्वास्थ्य नियमअन्तर्गत लागू गरिएको हो। उक्त नियमले खतरनाक सङ्क्रामक रोगको फैलावट रोक्न संघीय स्वास्थ्य निर्देशनहरू परिमार्जन गरेको जनाएको छ।
यसअघि सोमबार मात्रै सीडीसीले इबोला नियन्त्रणका लागि ३० दिने विशेष प्रतिबन्ध प्याकेज सार्वजनिक गरेको थियो। त्यसअन्तर्गत यात्रु स्क्रिनिङ, निगरानी तथा केही गैर-अमेरिकी नागरिकमाथि प्रवेश प्रतिबन्ध कडा पारिएको थियो।
नयाँ नियमपछि ग्रीन कार्डधारीलाई समेत तत्काल अमेरिका फर्कन नदिने व्यवस्था गरिएको सीडीसीले जनाएको छ। सार्वजनिक स्वास्थ्य सुरक्षा र आपतकालीन स्रोत व्यवस्थापनका लागि यस्तो कदम आवश्यक रहेको उसको भनाइ छ।
हालसम्म अमेरिकामा इबोलासम्बन्धी कुनै संक्रमण पुष्टि नभएको सीडीसीले जनाएको छ। यद्यपि सम्भावित जोखिम नियन्त्रणका लागि पूर्वसतर्कता अपनाइएको बताइएको छ।
